海洋佔地球表面積逾七成，人說她是生命之母，但污染不絕，有誰曾認真地愛護過她？「呢十幾年如果冇咗個海，我身體唔會好返，我亦都冇得玩獨木舟，我更加會冇咗自己，所以我對個海好有感情。」羅樹源（Raymond）如是說。每日見證着塑膠等垃圾在海面上載浮載沉，他說：「係咪只能夠隻眼開隻眼閉？我唔想咁，我個心會慚愧，我會後悔一世。」
六十八歲的Raymond曾在跨國物流公司工作三十多年，更晉升至管理層，但每天朝九晚十二的工作生活，終令他捱出病來。一九九六年，他確診患上肝癌，切除四分之一肝臟後休養半年痊癒，轉了一份工時相對穩定的工作。雖然病癒，但Raymond其後又發現患上肝硬化，到二〇〇二年五十歲時，他正式退休，「我睇化晒，我條命都差啲畀咗佢，錢對我嚟講唔係最重要，最重要係家庭。錢我唔係多，但有啲積蓄，日常生活慳啲使都夠用。」為了令自己有強健體魄，他開始茹素，還重拾放下廿多年的興趣——划獨木舟。
婆婆贈石屋 建基地與「男友」幽會
早在一九七二年，Raymond已加入醫療輔助隊拯溺組，學習獨木舟拯溺，自此鍾情獨木舟運動。一九七九年結婚後，翌年退出醫療輔助隊，專心賺錢養家，直至退休後才再次接觸獨木舟。「我醉心獨木舟，雖然廿幾年冇玩，但一划就即刻記起晒。佢好似我男朋友咁，好啱傾。」他每天都會從東涌逸東邨住所出發，到大嶼山一帶划獨木舟數小時，有時也會教人。二〇〇六年某日，他划往大澳途中，發現杳無人煙的䃟石灣，當中有一座被荊棘及野草包圍的荒廢石屋，萌生以石屋作獨木舟基地的念頭。他花了半年時間，成功聯絡居於大澳的業主，打算以月租五百元租下石屋，「個婆婆打量咗我好耐，覺得我唔係壞人，決定唔收租金，唯一條件係應承佢唔好做非法行為。」不收分文，令婆婆的親戚心生妒忌，婆婆遂於數年前跟Raymond上契，更去民政署宣誓，將業權授予Raymond，「將間屋名正言順送畀契仔，等我唔使驚佢啲親戚搞我，我好感恩、好多謝佢。」
對Raymond而言，䃟石灣就是他的天堂，「我呢十幾年身體可以咁好，就係因為喺度有運動量，有好嘅陽光同活動空間，空氣又好。」他養了六隻流浪狗，不時用獨木舟上的空位運送狗糧，每日都會為牠們添水添糧。「呢度係我十幾年嘅建設，我個心除咗屋企，就喺呢度。」天氣好時就從家附近出發，划一個小時，即使狂風暴雨，他也會踏單車前來，一星期最少來六天，「落雨打風都唔驚，因為我掛住啲狗嘛，又掛住啲花花草草，驚佢哋俾風雨吹倒。」他種了木瓜、大蕉、菠蘿、蘆薈及仙人掌等，自給自足，例如他會以蘆薈肉作早餐，以蘆薈皮用作潔膚、洗頭之用，「我洗頭唔用shampoo㗎！」
轟食環署 只顧執屍懶理垃圾
這十多年來，Raymond見證着附近的變化。「以前未有港珠澳大橋，如果好天，可以望到珠海嘅高樓。」大橋就在石屋對開不夠三百米處，「真係好礙眼，我日日都要望住條橋，又冇車用喎！我對呢個大白象工程非常失望。」風景有變，連海洋環境也有變化，「呢十年有好多建築材料污染海洋，海面越來越多垃圾，我划去邊都見到，垃圾嘅目的地咪就係岸邊。」我們請Raymond划一下獨木舟方便攝影，短短數分鐘，Raymond便帶着豆漿膠樽和發泡膠板回來，「划一陣就有垃圾執，真係隨處可見。」
除了海面垃圾，Raymond每日也會花時間撿走岸上垃圾，採訪當日只是短短撿了幾步路程，垃圾膠箱便告爆滿，紙包飲品盒、即棄膠碗比比皆是，「執都執唔晒，但唔執唔得，因為我睇唔過眼嘛！」由於地區偏遠，食環署一般不會派人清理，Raymond惟有自己動手，將垃圾帶到食環署會巡視的垃圾站，「如果我唔執，積積埋埋啲細菌，啲狗咪會病同埋死！」他憶述之前禽流感和豬流感肆虐時，岸上經常發現疑似從內地漂來的雞屍豬屍，「我一call食環，佢哋幾個鐘就嚟到執走晒。死雞死豬佢哋孭唔到飛，但膠樽垃圾佢哋得，所以咪唔執囉。」
因為有海洋，Raymond才能重拾獨木舟興趣；又因為有海洋，他才找到他的世外桃源。他覺得自己必須為保護海洋出一分力，「我睇唔到環保署做過啲乜，剩係收五毫子膠袋費。政府有咁多盈餘，點解唔肯攞少少保育費出嚟改善環境？」他決定由自己做起，尋找關心海洋塑膠垃圾問題的團體，一同以行動提醒大眾。
划獨木舟三十六小時 為海洋籌款
今年三月底，他划獨木舟由東涌出發，用兩日一夜時間，經大澳、長洲、南丫島等地前往西環碼頭，划了近六十公里，為綠色和平籌得超過六萬元。「啲親戚朋友個個都話我儍，又大浪又要划三十幾個鐘，問我係咪攞條命去較飛。但我唔會俾佢哋勸到，因為我覺得呢個就係機會。」他一個人拿着相機，一邊划一邊拍照，拍下沿途滿佈垃圾的海面，「成日同人講個海點被污染，啲人係唔會意識到有幾嚴重。我喺個海度影畀你睇，啲人印象咪深啲。」一時的關注可真有用？「有冇效我唔知，我唔講呢啲，唔係話預算幾多人關心、幾多人捐錢先去做，我做咗先算。」對他而言，海洋賦予他新生命，保護海洋已成為他的終身目標，「如果有得做而唔去做，我會過意唔去。人生係會有遺憾，所以我希望我呢個遺憾，可以唔使成為遺憾。我做完之後，我就問心無愧。我希望我有生之年，可以繼續做咁有意義嘅事。」
記者：李煒汯
攝影：黃智琳、林亦
-----------------------------
星期一至五晚上10點半
《動腦Q》Let's Q the money！
http://bit.ly/2QW8LcI
|
鍾意就快D Share啦！
|
|
|
