撰文：AuntieSam｜圖片：東星、Instagram、Facebook、節目截圖｜編輯：八卦妹
2019香港小姐首輪面試5個高質候選靚女IG大起底蔡嘉欣做過ViuTV主持 國際小姐湯洛晴勁有料！
2018國際小姐香港代表 Carmaney 湯洛晴
今年25歲嘅Carmaney原名為黃嘉雯，改左個藝名叫湯洛晴，同湯洛雯只係差一個字！呢位「小靚湯」2013年開始做model，拍過唔少廣告，仲代表過香港去東京參加2018國際小姐，如果入圍相信有望成為大熱！
除咗來頭唔細，身材亦係一啲都唔惹小！喺佢IG上面都有唔少泳裝低胸相，身材非常凹凸有致。個樣一開始望落，有幾分似宋熙年MIX朱千雪，再望多兩眼，又有啲似《都市閒情》主持劉彩玉嘅後生版，大家又覺唔覺？
靚女Youtuber Kayan.C 蔡嘉欣
如果有睇開YouTube，對Kayan C蔡嘉欣相信唔會陌生！理大紡織及製衣系畢業，現時年僅25歲，就已經係時裝店兼美甲店老闆。未踏入電視圈之前，本身就已經係一個頗有名氣嘅KOL，多數分享一啲遊記同旅遊資訊，IG、YouTube都分別有超過10萬followers。
2017年，佢就去咗ViuTV做清談節目《Trip精》嘅主持，之後亦有參與拍攝旅遊節目《返鄉下》，今次就過檔大台參選港姐。平時喺IG，可以見到佢好多去世界各地旅行嘅靚相，而名花有主嘅佢，仲不時會放下閃添！
三地混血兒 Mercedes Pair 彭美詩
外表鬼鬼地嘅Mercedes Pair，其實係菲律賓、台灣同德國混血兒，喺香港土生土長，講得一口流利廣東話。佢任職模特兒，曾經多次去外地參加選美，年頭仲獲得過Miss World Noble Queen International 2018（2018 世界華貴小姐 ）冠軍，成為首位喺國際性選美賽事奪冠嘅香港人。
相信Mercedes視選美為集郵，而今年港姐就係佢嘅目標。都啱嘅，世界各地嘅選美比賽參加得多，本土嘅名銜就一個都冇，咁又點得呢？不過佢自己就曾經講過，畀好多香港人笑佢又肥又黑，搞到曾經一度失去自信。睇返佢IG啲相，其實都好索下！唔知又入唔入到港姐嘅評審眼中呢？
九頭身美少女 Katy Yeung
走清純路線嘅Katy Yeung今年23歲，喺城大主修犯罪學。身高178cm，望落去有幾分似韓國女星，長手長腳可以話係佢最大嘅賣點。
42公斤翻版昆凌 Blossom陳熙蕊
九頭身美少女之後，最後要介紹嘅係只有42公斤、被傳媒封為「翻版昆凌」Blossom。睇落的的骰骰但原來都有163cm高，有一張一見難忘嘅V煞面，連講嘢個tone都好girlish，感覺非常gfable！咁當然咁嘅女仔有男朋友都好正常，一開佢IG就見到同男友嘅嘴嘴相，似乎兩個人都非常sweet下！
Blossom之前都有參選過2017年澳洲華裔小姐（布里斯班賽區），可惜就冇得獎。而平時鍾意唱歌嘅佢，更參選過《中國好聲音》2019澳大利亞海選（布里斯班區選拔賽），最後獲得賽區第4名同最具潛質獎。至於佢歌喉係咪真係咁好呢？其實佢喺IG都有post過《有一種悲傷》嘅錄音，大家可以自己去聽下……
|
鍾意就快D Share啦！
|
|
|
