「瘦版湯洛雯」着淘寶戰衣 做生意被轟取巧
港姐昨日舉行首輪面試，普遍質素不俗，大熱之一「瘦版湯洛雯」蔡嘉欣（Kayan）極速被起底，曾與無綫藝人拍拖，又被轟開時裝店「平嘢充韓貨」，更被指昨日所穿戰衣是90蚊「淘寶貨」。對此，她淡定逐一回應！另一風頭躉是與前港姐冠軍馮盈盈是「同學仔」的Mina Yeung，表現進取，會見傳媒時變身「甫士王」成功出位！
一年一度盛事《2019香港小姐競選》首輪面試有139位參賽者，有索爆Model，亦有甜到漏高材生，年齡最細18歲、最大27歲，當中亦有不少就讀國際知名學府如耶魯大學等，眾人昨晨於將軍澳康城港鐵站集合，坐車到電視城面試，其中「行孖咇」到場的蔡嘉欣（Kayan）及黃嘉雯（Carmaney）相當亮眼！
25歲的Kayan畢業於理工大學紡織及製衣系，曾參加過校花校草競選，現職為Model及YouTuber，有搞時裝生意，在社交網中有不少性感水着照的她，已名花有主，在網上擺錫錫相放閃！選港姐即成風頭躉的她被瘋狂起底，有指她曾與無綫藝人吳子沖拍拖，而她所經營的時裝生意，則有網民指她將淘寶貨平買貴賣。但Kayan的舖頭已在網上澄清，指已講明貨品「made in China」，又強調：「覺得我哋食水深就唔好幫襯。」但有些幫襯過她的網民繼續開Group喪鬧。
「嫩版郭可盈」水着照撒網
對於網民指控，Kayan承認以往曾到廣州買衫，現在則到韓國入貨：「但確保唔到100%韓國廠造。」有網友指她昨日一身裝扮是90蚊「淘寶貨」，她說：「係淘寶買，但我買200幾蚊呀！有時隆重少少嘅衫，香港反而唔知邊度買。（曾與吳子沖拍拖？）過去嘅嘢留番過去，唔好提，冇聯絡喇！（現任男友支持？）支持。（你男友係Banker？）係嘅。」而現年25歲的「嫩版郭可盈」Carmaney，曾代表香港到東京參選2018國際小姐，跟Kayan一樣喜歡在社交網放火辣水着照。
另一亮點，「進擊版糖妹」25歲的Mina Yeung，與讀香港大學的前港姐馮盈盈為同學，二人一齊參加過模特兒比賽，台上她甫士盡出零怯場，又派心心又托面扮花和單眼，表現可愛。她稱盈盈有畀意見：「盈盈叫我平常心，have fun。（佢hea你？）都唔可以太偏心！」
撞名王菲「求其改」
參賽者衣着大多以連身裙、端莊斯文為主，不過私底下不少佳麗都喜歡在社交網放火辣水着照，中英混血兒、18歲的梁靖嵐（Eleanor）在網上大晒比堅尼泳照，勁騷魔鬼腰之餘，更與外國同性朋友伸脷扮咀，作風大膽！而Vivian Yuen亦有放水着相大騷強勁事業線！至於身高1米78的高妹Katy Yeung，笑容甜美，主修犯罪學，其社交網水着相雖然不多，不過白滑長腿成為賣點。
此外，有兩位佳麗與藝人撞名，27歲的鍾嘉欣及23歲的王菲，王菲被問到名字來源？她說：「阿媽話求其改，冇特別，自己亦唔鍾意王菲。」昨晚七時許完成面試後，Kayan與Katy一同離開；Carmaney則與Mina、Cayley等結伴進入港鐵站，有講有笑，相當好傾！
|
鍾意就快D Share啦！
|
|
|
