馬上成為壹會員
會員專區 只限會員閱讀
入行多年嘅裕美，事業發展平平，但係佢嘅私生活就夠晒多姿多彩，不甘寂寞要拖接拖咁拍，拍到連佢自己都講：「拍到自己都覺得有問題，要去睇心理醫生。」裕美嘅感情史好多，連佢自己都話：「你要數，數一個節目都數唔晒！」追溯到佢啱啱入行時，E Kids嘅阮民安係佢男朋友，唔知佢哋仲有冇聯絡呢？「有呀，但唔係經常嘅，因為佢之前舉行演唱會，我有見過佢彩排。好好呀，都好戥佢開心，而家有小朋友。」裕美咁鍾意拍拖，係咪因為事業失意，要搵啲寄託？她說：「我覺得同事業無關，由細到大都好鍾意拍拖，從小第一個志願就係建立家庭，然後至係唱歌。可能因為我係單親家庭，每個人對單親家庭嘅概念都唔同，有啲可能會唔再相信婚姻，有啲會覺得無咩分別，我自己就好渴望，因為覺得自己無嘛，好想自己建立一個完整嘅，所以好想拍拖。其實有段時間拍到自己都覺得有問題，要去睇心理醫生，我話唔知點解，一定要不斷拍拖。」呢段時間維持咗幾多年？「好耐喇，我諗大概三、四年前，我狠下決心至少一年唔拍拖，最後真係做到年幾無拍拖。唔單只唔拍拖，係單獨同男仔出街都唔會。係喺黃子恆之後嘅，一來覺得好攰，二來覺得最後都係徒然嘅，對方都係唔適合嘅。另外會質疑自己係咪準備好做一位女朋友或者太太，其次覺得愛情講係好容易，好多書本話你知愛情、婚姻係點樣，到你真正結婚嘅時候，以為講咁容易？」
13年，裕美與林恩浩閃婚，不過3年後婚變，同時被爆與黃子恆出軌，事後裕美先同林恩浩離婚。唔知裕美認為當時同黃子恆一齊，係唔係選擇錯誤？「我覺得同黃子恆只能夠講timing唔啱，同埋我經常覺得，啱嘅人一定唔會喺錯嘅時間出現，所以我唔係好相信話喺錯嘅時間遇到啱嘅人，我唔係好相信，因為我經常覺得生命係有安排嘅，如果呢個人出現喺一個好奇怪嘅時間，就算幾好都唔係啱。甚至我喺嗰段時間好傷心，你知道男人係會逞英雄嘅，見到女仔唔開心就會安慰佢，身邊大把男性朋友，一聽到女仔唔開心，就算只係普通朋友，都會不斷聽佢講嘢，好有耐性，但結婚後對老婆又未必係咁樣，即係嗰種逞英雄嘅感覺，你feel到男仔會係咁樣，好鍾意保護一啲弱質嘅嘢。可能當時個狀況都係咁樣出現，而慢慢產生一啲感覺，但嗰種感覺係啱定錯，我慢慢發覺愛情都唔係靠感覺。講感覺嘅話，可能五秒鐘之後就會轉咗。」黃子恆出現後，先宣布離婚，當時裕美考慮咗幾耐先有離婚決定呢？「諗咗好耐，其實結婚九個月已經出現問題，真係好多拗撬，多到我都唔敢同阿媽講，因為當初阿媽都唔贊成我同佢結婚。不過年輕時都係不理後果，一意孤行，所以就決定結婚。但發覺有時候媽媽太過緊張個女，所以都唔會太聽媽媽講，但媽媽始終人生經驗都比較多，所以有時候有啲嘢佢係啱嘅，可能覺得呢個人唔適合你，但當時你同佢喺埋一齊，好難會聽其他人說話。不過我又覺得無話後唔後悔，因為真係經一事、長一智，每一件事發生都真係令我成長好多，同埋而家學習到一樣，就咩發生咩嘢事都唔好賴人哋，因為就算你覺得件事好唔公平，但始終會學到嘢嘅，只要做好自己，其實嗰啲事情都係幫緊你，其他例如有冇報應，就由個天決定啦。」離婚後，可以同前夫做朋友嗎？裕美坦言：「唯獨是前夫真係無辦法做朋友。之後嗰個都係無聯絡，但個心無咩嘢。」
黃子恆出現後，與前夫離婚，靜咗近一年後，再同老外拍拖，拍咗2年又分手，原因係咩呢？裕美說：「停咗一年之後遇到外籍男友，本身係鍾意外國人嘅，嗰次係第一次同外國人拍拖，自己都無諗過，都幾好嘅，不過有啲地方……我嘅好朋友都係同外國人一齊，佢最初同我講嘅我都唔明，不過自從同外國人一齊之後，同嗰位好朋友就好似做咗媽媽之後，講嘢都好有共鳴。就算英文幾叻都好，因為我唔算好叻，但係嗰位好朋友本身英文好好，佢話就算英文幾叻都好，可能有啲字、有啲意思，佢get到嘅會唔一樣，甚至大家嘅文化上有啲位唔一樣，唔係話佢哋文化特別開放，大家都係好專一嘅，但係可能對於結婚問題，大家想法會唔一樣。」同老外男友分手後，好快，裕美又被踢爆搭上林作，大家而家嘅關係係咩？「我哋係好好嘅，我話好好，冇講啲咩呀而家。」林作比較成熟，會唔會溝通上會比較好？「當然佢係一個好聰明嘅人，喺佢身上都學到唔少嘢，但我最欣賞係佢好肯幫助人！」因為咁而令你對佢有好感所以一齊？「我又唔知喎，呢方面有啲複雜，我只可以話佢個人比我想像中好，最初認識佢係因為同公司，對呢個人好反感，覺得佢應該係讀書讀到short咗，但佢聰明嘅地方係遮蓋自己能力好高，甚至比我們更識得喺娛樂圈生存。因為我做咗咁耐，以前有時候啲對答都係戇居居咁樣。」聽裕美今日嘅對答，就知道有個林作男友，訓練係有素嘅！「係無呀。嗰時覺得佢係嗰種，就算講真嘢都無人信㗎喇，我唔係話要模仿呢個人嘅做法，只不過覺得有時都啟發咗好多嘢，就係唔需要太認真去面對一啲報導，就係因為學懂咗呢樣嘢。」
攝錄：王志明、吳斯金
策劃：肥A
蓋世寶化妝及髮型：Albee（嫁妝）
立即下載APP，精彩內容壹手掌握
如對會員訂閱制有遇到任何問題或意見，你可以致電 2623 9985，或電郵聯絡客戶服務主任cs@nextdigital.com.hk，我們定當盡力協助！
來源 source: http://nextplus.nextmedia.com
|
鍾意就快D Share啦！
|
|
|
