一向勇敢發言的黃秋生，日前聲稱因感疲累撤離fb，原來他低調轉往twitter繼續就社會現況發聲。秋生昨日以演藝學院首屆畢業生身份，出席以「白色恐怖下何去何從」為題的座談會，跟師生對談敏感的社會話題。
相關新聞：香港白色恐怖金義聖斥暴戾
黃秋生為香港演藝學院首屆畢業生，昨日應演藝學院學生會邀請，出席「白色恐怖下何去何從」為題的座談會，與師生及校友等分享感受，甫開始現場已有人大叫：「時代革命！」秋生座談會開始時率先表明愛國：「我好愛國，你一送中，人哋取消你個特殊地位，香港就玩完。如果香港玩完，對於祖國經濟好大影響，因為我哋愛國，所以先要反呢個送中。」即時搏得全場掌聲。
傳統中國忠孝仁義
現場同學問秋生愛國和港獨可否同時存在？覺得自己是中國人還是香港人？此刻會選擇愛國還是港獨？秋生也大膽發言：「港獨，我真係唔係好清楚個理念，即係香港獨立成為一個國家叫港獨？香港高度自治又叫港獨？根據上面理解，有身份證就係港獨，咁全場都係港獨，幫香港發聲又係港獨，唔同意我又係港獨，從咁理解係人都港獨。但從國家政治、經濟、軍事嚟睇，我又睇唔到香港好容易可以做得到。」
秋生續說：「我𠵱家多謝年輕人，令到我覺得自己係香港人，呢件事好震驚，所有人出嚟都有好高情操。至於愛國，又係定義問題，我心目中嘅一個傳統中國，係忠孝仁義、德智禮信。如果我將成件事從另一個角度去睇，如果我以藍絲嘅觀點去睇，將人比喻為曱甴、垃圾、廢青，但我唔同，我係人，所以我殺嘅係曱甴，唔打得你？唔搞得你？唔可以用粗口鬧你呀？如果做中國人做到咁，我話唔係，但喺我心入面、理念上係愛我嘅中國。」
對抗魔鬼易變魔鬼
社會普遍認為警察失控，有同學贊成「以暴制暴」，秋生卻不認同，反而覺得應「止戈制暴」，追究的同時應學懂原諒，他說：「尼采有句名言『當你凝視深淵，深淵也在凝視你』，你對抗魔鬼時好容易會變成魔鬼，仇恨可能會令你做錯一啲嘢。」秋生更不認同警察家人要受牽連：「即係你強姦我個女，我姦番你阿媽，關人哋老婆個仔乜事，呢點我唔能夠同意。個政府真係白癡，唔通個仔唔食飯摑佢兩巴，講粗口摑佢四巴，唔返學摑佢八巴，摑到牙都甩面都腫埋，跟住摑到佢癡癡呆呆，腦殘再摑X多你36巴，仔都瓜埋。香港都死埋，你仲做乜鬼嘢特首，收皮」秋生更直言覺得政府已不能控制警察，他覺得政府先要解決這班「山賊政權」。
不少示威者遭暴力對待，秋生說：「我唔係話反對以暴易暴，係講緊呢個暴去到乜嘢程度，兩軍對陣，就梗係打仗……但係講到去騷擾人哋屋企，呢個暴力咪過咗火，我係講緊呢樣嘢，就算對方做咗一啲過份殘忍嘅嘢，我哋都唔可以去學佢哋。」有學生問秋生如何對付無賴？秋生笑說：「我通常係笑佢哋，之後會無視佢，都幾冇癮！」其後有老師感謝秋生到學校與同學見面，提到有同學在情緒方面受到困擾，秋生說：「所以𠵱家要搵啲老鬼出嚟輔導，唔好俾仇恨影響咗眼睛，控制你嗰個係魔鬼，佢會影響你整體生活。」
轉戰twitter覓自由
有同學問到秋生會否以知名度，令國際更關注事件？他笑說：「叫我影響Donald Trump（美國總統特朗普）？全世界得一個人影響到佢，嗰個叫習近平。」提到近日「撤離」fb，秋生強調是私人決定，但原來他低調轉玩twitter，秋生第一個帖文就是以英文留言：「我離開了fb數天，有朋友跟我說這裏有更多自由及樂趣，是真的嗎？」他連日來也有就時事留言，還追蹤台灣總統蔡英文。
採訪：羅慧敏
攝影：沈健程
|
鍾意就快D Share啦！
|
|
|
