(Getty Images/互聯網)
自從爆出美斯合約條款中，容許佢可於今季結束後自由身離隊，輿論開始猜測呢位阿根廷球王係時候離開母會「舒適區」，去接受新挑戰，阿仙奴球迷率先發起「免費簽美斯大行動」，紛紛於社交網提出訴求，呼籲兵工廠出手於明年夏天簽入美斯，幫佢實現「英超夢」。
有廠迷話：「如果美斯加盟阿仙奴，將會係辛列伊（阿仙奴足球主管）嘅大師級簽人，係時候打破美斯無法適應英超嘅講法。」
亦有人話：「美斯明夏可以離開阿仙奴，辛列伊請施展你嘅魔法。」甚至有阿仙奴球迷老作美斯2004年已經想加盟阿仙奴，所以要幫佢實現登陸英超嘅夢想。
廠迷口中嘅阿仙奴足球主管辛列伊2018年2月加入阿仙奴管理層，接替前行政總裁加斯迪斯，最關鍵係佢之前就係擔任巴塞隆拿足球總監，以佢嘅人脈，拉攏到美斯入「廠」並唔出奇。
另一支英超勁旅曼城早年已計劃收購美斯，但當年巴塞唔肯賣，佢依家已經32歲，加上明夏可以自由身離隊，如果美斯一心想走人接受新挑戰，巴塞都阻唔住佢。
美斯同C朗長達十幾年「球王相爭」之中，美斯其中一大輸蝕地方，係佢一直效力巴塞，不時被嘲諷離開「舒適區」就冇料到。
反觀C朗喺葡超、英超、西甲、意甲都取得成功，美斯都係時候「離家出走」，證明自己唔係「門口狗」。
立即參加「賞您睇」：https://tinyurl.com/yxa3a8z8
Click下面粒掣，儲on.cc coins！機票、家電、超市禮券、過萬份獎品等緊你。
來源 source: http://hk.on.cc
|
鍾意就快D Share啦！
|
|
|
