曾在TVB專演惡人及負心漢奸角的戴志偉，早前被本刊發現背妻出軌，跟年約35歲，同一公司的保險同事Candy偷食，事件曝光後戴志偉由起初否認，到向大批傳媒追訪時發爛，大大聲:「我做咩錯事，有咩錯事！」，隔日後情緒平伏，他即撲出來維護小三，為Candy連日愈揭愈多的臭史說好話，反之對被背叛的老婆，沒有公開認錯道歉。由本刊踢爆到他的連串反應，在這條長達九分鐘的內容，一片睇晒。
59歲的戴志偉，在疫情下把口罩功能發揮得淋漓盡致，除用來抗疫，還方便遮住面口去偷食。11年他劈炮唔撈TVB後，轉行做保險，現在AIA做到分區經理。不過最近在保險界傳出，這位人夫與一名16年入職的年輕女同事Candy有非一般關係，而壹仔亦發現，這位不時偕妻行街睇戲的甜心老公，原來已出軌。 早前見到他陪完老婆，轉頭同小三Candy戴住口罩浪漫去淺水灣看海。拖著女同事的戴志偉，一臉回春樣，打扮亦比以前年輕。為避耳目，雖然他倆揀人流較少的沙灘拍拖，但一見迎面多人，偷食人夫的Candy，心虛下作出耷低頭的本能反應，怕給熟人認出。 這位年輕女同事，帶給59歲戴志偉的出軌刺激，從一幕幕拍拖畫面已知一二！當望著從洗手間步出，行得婀娜多姿的Candy，戴志偉即上前逗對方，被氹得鬼咁開心的Candy亦回他一個含情樣，旁人看似肉麻的舉動，但在他倆卻相當陶醉。只分開一個去洗手間的短暫時光，戴志偉已心急拖回Candy隻手仔，十足初戀般發燒。天黑，人夫戴志偉要返家交人，唯有揸車雙雙離開。 二人因同屬一間公司，背著人夫身份偷食的戴志偉自然要避忌，故撐枱腳這些飯聚行為，要前後腳進行。3月24日中午，戴志偉先從公司離開，駕車到公司附近等侯，殿後的Candy過十分鐘才落樓登上他的車。之後二人選了遠離公司，約五分鐘車程的新世界K11享受二人世界。 撐枱腳其間，除下口罩的Candy露出真相，對比她在ig的相，真身Candy似有點人工化，不過前身是化妝師的她，把一雙眼睛化得相當具電力，加埋甜笑攻勢，令人夫戴志偉吃得開懷。撐完枱腳，又是前後腳返公司，不知是否為避免同事耳目，他在公司附近一個禁區位放低Candy。
熱戀期總是痴纏！翌日二人再約會，不用上班便揀在銅鑼灣撐枱腳。飽暖後有咩做？戴志偉忽然用手機作狀要為Candy拍照，男友揸機，Candy即擺個嬌俏回頭甫士。嘩，相信只有春心蕩漾的戴志偉最受落。為見一面約食晏，之後戴志偉要交人，小三唯有lonely睇包包。 密會Candy後，人夫戴志偉另一日，做番「好老公」載老婆去尖沙咀shopping。不過當日他只當柴可夫司機，待老婆獨自逛完，校啱時間的他駕車接老婆一起返家。對比同Candy的甜蜜時光，他與結婚幾十年的老婆，夫妻生活就平淡得多。 59歲的戴志偉，有車有樓，兩名兒子亦大學畢業。雖然持有的馬鞍山物業，是跟老婆聯名，但一把年紀仍溝到女，相信自有把炮之處。其中音樂才華是冧女必殺技，他曾把自彈自唱片段上載youtube，片中拿著木結他彈唱外，還吹埋口琴，真係唱得，彈得仲好吹得。此外溫柔細心亦唔少得，撐枱腳時，為Candy夾餸加醬汁，體貼入微，冧盡對方。 至於小三Candy亦唔弱，常常報以傾慕眼神，撒嬌及甜笑等男人最受的反應，難怪令人夫戴志偉如此著迷。其實二人可謂物以類聚，事關女的同樣背住拍拖超過六年的正印男友Terry出軌，今年初開始搭上人夫戴志偉時，她跟任職酒店的Terry關係未斷。不過Candy把近年與男友的sweet合照「撤離」其ig，表面一副單身姿態。反而Terry一直公開與Candy的情侶關係，今年一月依然有二人的合照，及多年來二人一起周遊列國的甜蜜時光，這段四角關係，到底戴志偉事前知否？ 做得小三，少不免有進取心。Candy由化妝師轉到AIA初期任職秘書，近年再轉做保險經紀，是保險界一哥連炎輝屬下，同做到分區經理嘅人夫戴志偉同組，因而暗暗撻著。她在ig的座右銘:「If u want change,u hv to make it,if we want progress,we hv to drive it！(如果你想改變，就必須去做，如果我們想要進步，就必須推動它。」，放在她容貌進化上，真的實踐了，昔日這位小三鼻樑不高，方面，發展至近年下巴又尖又兜，鼻樑高企的新面貌。 日前壹仔向戴志偉求證與Candy關係，他一聽到Candy個名，即加快腳步欲迴避追問，邊行邊說:「我冇嘢講，完全冇咁嘅事，我唔知你講乜嘢。」，對於跟Candy的親暱行為，越走越急的他，更忽然一個U-turn回頭登上其座駕，並說:「完全冇，唔好亂講，完全冇，冇嘢回應。」
不過呢頭問完戴志偉，轉頭Candy個ig，話咁快就set了private，東窗事發，當然第一個要通知當事人
壹仔曾致電Candy，接聽的女子，起初沒有否認是Candy，但一聽到記者的問題，女子猶豫數秒後才回答冇此人，匆匆收線。 4月5日，出軌爆出後，面對大批傳媒等候追訪，火爆的戴志偉無戴口罩，一落車即發爛狂噴:「做咩跟我！我報警，做乜跟住我？我做咗啲乜？」拿起手機反拍傳媒並報警。
對住戴了口罩防疫的傳媒，情緒激動的戴志偉說:「我依家報警，你哋全部唔敢以真面目示人，我冇戴口罩，我光明正大。」但同小三Candy外出拖手時，二人又戴晒口罩，做足功夫。
有記者問他可否就Candy拖手事件「講兩句」，他隻字不提，繼續一味鬧:「你follow我，去到邊跟到邊，影晒相，做埋啲衰嘢，我有咩做，我行街唔得呀！」，「你哋啲嘢我朋友無睇過，冇人睇，但你影響到我家人，做乜講啲咁嘅嘢，我做咩錯事，有咩錯事！」。他自言:「我係好好先生，唔發脾氣，但今次忍冇可忍。」，之後一個「射波」:「我係退休演員，你去追古天樂啦，去追星」
佢不斷問，要搵負責記者，叉住腰，語帶恐嚇繼續講:「你小心我會搵你。」，「你影俾佢睇，叫佢以後唔好做呢啲嘢，如果唔係你瞓都瞓唔著，有人搵到你上門，你小心。」 搭上戴志偉，成為小三的Candy臭史被人愈揭愈多，有同學向傳媒爆，指她中學時煲煙，爆粗，當時觀音兵已經車輪轉，私生活甚亂，還傳她年少時未婚懷孕，誕子後交由男方照顧，兒子現時已經成年。 發爛後事隔一日，冷靜下來的戴志偉，即撲出來維護小三，他接受傳媒訪問時，自言正在處理事件。被問到跟Candy是甚麼關係時，他強調二人是朋友，並表示：「佢係乖女，佢好無辜！」
至於有否向老婆和兩個兒子解釋，戴志偉說：「我要啲時間處理，處理緊，遲啲再同大家講。」他坦言目前自己都要冷靜下，談到之前對傳媒大發脾氣，他說積了好多怨氣，希望大家給他時間去處理。
希望他知道，老婆的感受才是最需要照顧。 ----------------------------
【壹週刊 武漢肺炎專頁】
緊貼防疫資訊！口罩訂購情況、確診個案、病徵潛伏期、封關國家名單、保險點賠？
與你遠離瘟疫 睇清官謊！
-----------------------------
【昔日紙本檔庫】
30年壹仔經典 壹壹重現！
-----------------------------
【全新電子書平台｜本書】
《沙士風暴》全面揭露沙士真相
來源 source: http://nextplus.nextmedia.com
|
鍾意就快D Share啦！
|
|
|