藝人馬國明、黃智雯、胡鴻鈞等主演的無綫劇集《降魔的》於兩年多前播映時極具口碑，成為網民及觀眾心目中的最佳劇集。直至《降魔的2.0》開拍時，觀眾已相當期待，而此劇播了三天，網民評論好壞參半，好的是對白過癮、節奏明快。但亦有網民批評劇中CG效果好流、馬國明飾演的「小馬」上輯一樣沒變化，而上輯深入民心、胡鴻鈞飾演的石錦當似乎依然在觀眾心，很多都指喜歡石錦當多過豪仔。
對於多個網民「失落位」，監製方駿釗、馬國明及胡鴻鈞都各有說法，方駿釗先解釋CG效果太流：「其實今次CG比第一輯進步咗，投入嘅資源亦多咗，不過網民覺得好流、好假都明白嘅，始終香港電視製作budget唔可以同荷里活相比，但整體嚟講我覺得已經靚咗好多。」
至於「小馬」一角，他指是專登設計的：「一個三十幾歲嘅中佬，雖然佢個心好想轉變，好想承接石錦當嘅天命去降魔，但奈何生活逼人，人始終會有劣根性，會鹹濕、會貪心，呢個都係我哋特登嘅設定，唔想佢咁快變降魔大師，咁樣反而冇咁好睇。」監製又賣關子，指下星期劇情開始入戲玉，小馬會遇到大劫，更會被殺，墮入另一個世界。
此劇另一搞鬼之處是有不少串星，前晚一集清潔二人組《愛‧回家》的Terry、KC已出場，二人還搞笑咀嘴，之後陸續登場的有大小姐林淑敏、徐榮，二人飾演一對，其次還有陳瀅、楊明、江嘉敏、阮小儀等等。
對於網民批評「小馬」一角沒轉變，馬國明謂：「每個劇都要舖，唔會第一、二集就有高潮，大家慢慢睇。不過小馬係連續角色，唔會跳得好緊要，但之後佢會成長，有啲位要賣吓關子先。」他表示自己都有留意觀眾反應，很多反應都不俗，指很好笑，節奏明快。
至於CG方面，他謂：「好似第一輯咁我哋唔係專登以CG作賣點，我哋亦唔會好似荷里活咁，好多錢擺落特技度，我哋主要係SELL劇集，小馬同豪仔、芷若（黃智雯）、啤啤（劉佩玥）會發展到點呢?觀眾要繼續收睇。」
而觀眾心中還是喜歡石錦當多過「豪仔」，胡鴻鈞謂：「我自己覺得豪仔嘅角色好立體，佢嘅性格會隨着劇情一路都有改變，希望各位觀眾都會慢慢喜歡佢。其實豪仔係一個悲劇人物，佢嘅情緒變化其實仲多過石敢當。其次，其實我覺得套劇最吸引嘅地方從來都唔係CG，而係劇情。畢竟套劇啱啱先播咗兩集，所以希望大家會繼續追落去，因為嚟緊嘅劇情都會非常峰迴路轉！」
來源 source: http://hk.on.cc
|
鍾意就快D Share啦！
|
|
|
