一場武漢肺炎，嚴重打擊香港經濟，各行各業都大蕭條，「疫巿」下守業難，創業更難。波爾錶太子女楊茹庭（前名楊如芯，Sean）近日跟友人在淺水灣商場內開了一間教育中心Eav Education House，已試業一星期。Sean日前返中心巡視業務，她跟員工一齊共渡時艱，希望盡快捱過疫情。
Sean近年做的生意，涉及不同範疇，由家族賣錶、金邊搞房地產，到去年賣魚子醬及即食鮑魚，以至最新經營的教育中心，每一瓣都沒有關連，Sean日前接受《蘋果》專訪，她直認貪新嘗試，「係呀，我希望試唔同生意，挑戰吓！」Sean笑言：「咁多瓣，我最鍾意都係吃喝玩樂，最緊要帶到開心畀人。」性格爽朗的她一直是大家的「開心組長」，Sean表示此構思來自拍檔的孩子，「兩個小朋友好鍾意玩slime（鬼口水），佢哋同媽咪講，好想開一間類似咁嘅education house，我哋商量咗，就決定開一間，咁小朋友就可以約埋同學一齊嚟玩開心啲。疫情爆發呢幾個月，小朋友冇得返學，困喺屋企都唔開心，有咗呢度，父母可放低子女嚟玩，父母自己去輕鬆吓，之後一家人又可以喺淺水灣享受吓親子時間，我宗旨係希望入嚟玩完嘅小朋友都會笑住離開。」
Sean的其他生意都已上軌道，所以她最近會放大部份時間和精神把教育中心搞好。中心改名Eav，有着Education、Achievement和Velocity的含意，「疫巿」創業面對困難加倍，Sean這次斥資逾百萬更不容有失，「租金、人工同生意全部都係問題，我哋年幾前籌備，原本去年底就想開，後來又撞咗好多嘢，疫情令計劃打亂，一再延期到呢個月先開到，請落咗十幾位員工全部keep喺office返工，我明白大家都要養家，即使中心遲咗開，我哋都冇縮減人手。呢段期間，我一直睇住盤數，單係裝修都搞咗4個月，好彩業主免咗兩個月租，2月到4月又減租一半。」Sean表示條數計完再計：「本來預計開業一年可以回本，但疫情影響遲咗大半年先開到，回本又要遲啲，賺錢之餘，我都想做啲嘢回饋社會，我開始着手同慈善團體合作，打算每周騰出兩堂時段，安排基層或智障學童免費入場，守業守長啲唔緊要，最緊要畀到一班小朋友開心。」喜愛挑戰的Sean預告未來還會繼續投資不同類型的生意。
訪問當天，Sean帶記者參觀約二千呎的教育中心，場中佈置色彩繽紛，空間很大，她表示坐滿最多只容納約20位小朋友。中心主要為小朋友提供不同的STEM課程，訓練孩子的邏輯思維，Sean解釋：「STEM係Science、Technology、Engineering同Mathematics縮寫，希望透過科學元素課程，啟發小朋友頭腦。」中心不但安排小朋友跟年齡分組進行LEGO Education，在導師指導下，由淺到深學習，小朋友還可以DIY製作鬼口水及讓家長租場開P。
Sean更親自體驗小朋友着迷的鬼口水，她依導師指示把原材料混合，Sean一邊攪拌，一邊說：「好似整蛋糕。」然後自由在鬼口水中加入金粉和Charms，再盡情揉捏、拉扯、塑形，Sean更嘗試把它扯高變薄膜，再整成一個氣泡，童心未泯的Sean搓得過癮：「搓按時好有手感，如果有壓力時想掟嘢，不如搓吓撳吓，越玩越開心同治癒，我而家明白點解啲小朋友咁鍾意玩，佢哋一玩可以搓幾個鐘。好多家長怕金粉灑到屋企成地難清理，嚟呢度玩唔怕整污糟。我哋揀嘅slime材料冇硼砂成份，符合安全標準，唔會對小朋友造成傷害。」
撰文：比華利
攝錄：馮嘉銘、林賓尼
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
