藍奕邦離開環球唱片後變得更敢言，繼日前在社交網鬧爆撐警譚詠麟是廢老後，昨晚阿邦在IG踢爆為Robynn & Kendy填詞的最後一首歌《紅白》，因為歌名是顏色，曾被環球列為禁歌，一度拒推出，當歌曲終於出街後，他收到許廷鏗（Alfred）開心到爆粗的短訊：「X you！」兩人更在商台節目上演繹《紅白》的男男合唱版。
昨晚阿邦在社交網貼「叱咤樂壇在家音樂會」的視像訪問片段，留言：「一直未有談及 #紅白 這首歌，就係等一個可以將一切講清楚嘅時機。原本舊年四五月，我同Robynn & Kendy同高佬坐埋一齊構思，諗住一齊做一連串所謂『令事業更上一層樓』嘅hit songs，點知到最後原來大家一齊做緊一隻告別作（包括我在內）。」R&K和阿邦都相繼離開環球。
阿邦踢爆《紅白》因顏色被禁：「其實上年8月已經做起，但係一來環球話個歌名係顏色會令人以為牽涉政治，叫我改歌名我死都唔肯改，二來當時社會狀況根本消化唔到一隻咁嘅歌，就hold起咗。到經歷多一陣子R&K亦決定都係唔續約休團，我哋都以為首歌會不見天日㗎啦。今年年頭，環球講到明唔改歌名一定唔會出，就算改咗都未必會出，我哋四個包括高佬都寧願鎖入夾萬，等某朝一日R&K復合先出都未遲。吖！點知最後乜改動都無地出咗，好神奇！」
《紅白》終於面世，許廷鏗都被觸動了，阿邦續寫：「而隔咗一陣，某早上Alfred whatsapp我兩句，就係：『紅白』下一句：『X you!』 原來呢首小小嘅歌，令到至少一個男生動容到爆粗，就造就咗今次一個男男合唱版。多謝R&K無怪過我堅持唔改歌名，因為我靈感來嗰一刻係真係『紅白』兩大隻字喺我腦海標出嚟嘅，I have to respect my inspiration. 我一直都有耿耿於未寫到一份A++嘅詞畀Robynn & Kendy，今次呢份，我問心無愧真係十倍奉還，好彩終於寫到，否則真係無覆桌機會。亦感謝Alfred賞識，希望有機會再喺台上合唱多一次。」
而許廷鏗解釋點解會激動：「因為歌詞篤中我心裏面唔敢開嘅盒，當年《青春頌》攞no.1，經歷契媽中風，悲喜交集感覺，估唔到2020年有呢首歌講紅白二事咁到位，我好想嘗試唱呢首歌。」
-----------------------------
App內1-Click訂閱《蘋果動新聞》
按此了解更多
來源 source: http://hk.appledaily.com
|
鍾意就快D Share啦！
|
|
|
