前港姐歐陽巧瑩於今年3月約滿後狠撇無綫，當時歐陽巧瑩亦指老公「木偶哥」林師傑會與無綫提早解約。今日林師傑就在社交網中宣佈已跟無綫及星夢解約，大爆無綫要和他轉簽「6 show」約，保證他有12,000收入。咁皇恩浩蕩，林師傑要解約都好正常！
林師傑今日在IG中出post，正式宣佈與無綫及星夢解約，他以歌手身份入行，在大台時聽得最多的問題是「你幾時出歌呀」，奈何每次聽到這個問題，自己都覺得心痛：「其實唔係唔想出，係冇得出，自己寫埋寫埋至少十幾廿首喺床下底，諗點樣蒙面出歌，諗咗5年，做現實中嘅木偶哥。」而林師傑亦爆無綫要求他轉簽「6 show」合約，即每年保證他有12,000元的收入。
對於無綫的「厚待」，已成家立室的林師傑，並不敢接受：「舊公司向我提出轉簽6 show合約，即意思一年保證有萬二蚊收入，雖然連1個月租金都不夠，但確實有如上天恩賜，我萬二分感激！我今年32（歲）有家室，請問如何接受呢份恩賜呢？」
林師傑指11年前參加比賽做歌手，現時想重新出發做獨立歌手，他又感激老婆歐陽巧瑩陪自己一起捱窮。林師傑接受《蘋果》訪問時，坦言現時仍在處理自己的思緒，不諱言對「6 show」合約收入感不滿，他續道：「有嬲，有唔開心，有開心，亦有唔捨得，因為畢竟11年。」至於問到是否因老婆歐陽巧瑩多次於個人社交平台上公開發聲，支持黃色小店而連累他受到「政治打壓」，他說：「關唔關老婆事都唔緊要。主要係我決定唔同TVB續約。『6 show』實在太離譜。」
至於歐陽巧瑩之後亦於IG中出post，表示從來不希望跟無綫有關係的她，今日亦需要多謝無綫放生老公：「由我離開TVB至今，無論私下定公開，一句不是都冇講過，因為我真係唔想再同佢有關係。但今日我想講一句，多謝放生我老公。」不過她同時亦寸爆地叫無綫收回12,000元的恩賜：「請收返起你哋嘅恩賜，我哋會過得好好！」
林師傑在西班牙出世，父母均曾為無綫人，林師傑於2009年參加第一屆《超級巨聲》而入行，一心想做歌手，雖然曾與同屆的許廷鏗、劉威煌、陳鴻碩合組「Super 4」後推出過歌曲，但始終發展平平，直至2012年，林師傑演出處境劇《愛·回家》及為劇集創作6首插曲，靠「木偶哥」個朵才稍為人所熟識。
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
