2020年6月25日星期四

【頭條獨家】教整健康飲品變瘦身KOL 傅穎急買新運動衫褲上鏡用 #傅穎

【頭條獨家】教整健康飲品變瘦身KOL 傅穎急買新運動衫褲上鏡用

雖然戴晒口罩，但Theresa唔難認。睇嚟佢好鍾意戴呢頂粉紅帽，出街戴，沖嘢飲又戴。

去年由內地回歸香港發展的傅穎(Theresa)話咁快35歲，返港後撞正社會運動同新冠肺炎疫情，所以Theresa都冇乜工開，好彩世上有ig。之前Theresa玩微博玩得好瘋狂，而家玩ig亦玩得好癲，日日都有Post，仲係咁拍片教人整健康瘦身飲品同食品，變瘦身界KOL成日要出鏡，所以日前見佢去買運動褲，無得試，齋摸質地都照入手，睇嚟趕住用。截稿前得知Theresa嘅ig被刪除，原因係含有暴力內容等問題，乜都冇晒，慘嘞。

採訪:梁志明

Theresa近年努力減肥瘦身，仲搵健身教練同佢操肌肉，想瘦得嚟又有肌肉，線條靚啲着衫又靚啲，話晒單身，明嘅。加上同吳千語拍緊ViuTV套新劇《熟女強人》，兩人有感情關係，仲會有錫錫鏡頭，唔知有無床戲或性感演出，咁Fit啲出鏡又好睇啲，最重要吳千語細Theresa九年，又係明晒。

冇得試都買

日前下午，着住Oversize Tee同黑色Legging，戴住粉紅色Cap帽及口罩，孭住tote bag嘅Theresa獨自去銅鑼灣希慎睇運動衫，期間都幾多電話，逗留15分鐘，佢乜款式都睇，沉色鮮色一樣啱，佢全程係咁摸啲衫同褲嘅質料睇吓彈性如何，因為冇得試身，摸咗一輪，最後入手一條運動褲，畀完錢就將戰利品放入tote bag，女友人校啱時間到達，兩人就一齊離開。