無綫近年出現財政赤字，不少藝人被迫減騷，如老戲骨劉江、古明華、李麗麗等相繼離巢；舊人留不住，新人也抵不住低薪被迫轉行。第26期藝訓班出身的陳家良，入行8年，雖然是前無綫金牌監製潘嘉德契仔，拍過超過50部劇集，但角色不起眼，他於今年6月初約滿後決定離開。
陳家良昨日接受《蘋果》電話訪問時說：「約大半年前同公司傾過一次，當時我想轉簽1騷或6騷，咁就可以喺其他電視台亮相，但TVB想我簽21個騷，佢哋話『你喺公司服務咁多年，都想你係full time藝人。』都講得好好聽嘅，但變相綁死我就乜都做唔到。」他透露入行頭6年底薪加每年爆騷，月入都有1萬餘元，但近兩年不停減騷，只靠底薪實在難以為生，他說：「嘩，絕對係生存唔到，$2,988！原本差唔多約滿應該會傾多次，但可能佢哋唔接受我開嘅offer，我突然收到封信，話『多謝你為TVB服務咁多，你份約已到期』。」
現年29歲的陳家良，第一份工便加入TVB，做過台慶的禮儀先生，穿起西裝幫手推蛋糕到台前，近年有較多出鏡機會的劇集，包括《三個女人一個因》中飾演袁偉豪的弟弟利東健，還有《十八年後的終極告白》演警察做黃智雯的下屬，但發展遠不及同屆藝訓班同學何廣沛。陳家良入行多年不搞緋聞，也沒有是非，但相對而言知名度近乎零，陳家良苦笑說：「少少欷歔，但冇辦法，一命二運三風水，嗰條命未到我呢個位置，我喺呢行幾努力都可能未輪到我。」
不過，陳家良多年來亦有增值自己，最近與友人合資開設室內設計公司，還做有關樓宇的保費融資，他說：「我係屋邨仔，追求夢想之餘都要食飯。以前只會喺自己角度諗嘢，覺得你唔搵我拍嘢，你嘥晒啦；但做室內設計係幫人度身訂做一套嘢，自己個mindset都有少少改變，學懂喺人哋角度去諗嘢。」家良直言不會放棄演藝事業，相信未來會有更好的發展 希望各方面都能兼顧，他說：「契爺（潘嘉德）畀好多意見我，同我講呢行一個男人，唔好諗住咁快出頭，佢睇得好透，叫我勤力啲做嘢，唔好推job，我不嬲都抱住呢個精神工作。但我都要感激公司多年來嘅栽培，因為讀訓練班都係加入娛樂圈一個途徑，今次離開令我更睇清楚條路，反而可以多方面發展，令個人更加健康。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|