「死因無可疑」這組字，過去一年大家聽得多，萬般滋味。今個星期上畫，林嘉欣、黃秋生演出的驚嚇電影《死因無可疑》，講的不是無名浮屍、少年跳樓，而是由呃保險引發的連串恐怖事件。林嘉欣再次和自己過不去，按老公袁劍偉導演要求，變身單眼瘸腿、爛賭暗黑中婦，「角色同我林嘉欣實在太唔同，所以我無話抽離唔到。」
【增肥10磅首次入賭場】
林嘉欣影相時總是嘻嘻哈哈，吃着牛角包講笑，一埋位就變了另一個人。林嘉欣是典型同自己過不去的演員，越大挑戰越喜歡，醜女、性格扭曲的全沒問題，新作《死因無可疑》為演單眼暗黑中婦角色，特意增肥10磅、不染頭、不修甲三個月，又不理醫生的四小時配戴指引，長戴特製隱形眼鏡拍片。「辛苦！但我鐘意用呢種唔方便、唔舒服去幫我（入戲)。當我戴con時，有一邊眼係睇唔到，好吃力，咁要用耳仔帶動個人，成個形態都唔同咗，到我一除左con ，就變返林嘉欣喇。」從未去過賭場的她，更特意去澳門賭廳觀摩中年師奶如何賭錢，她發現女賭徒身上衣着總有點紅紅紫紫，又怪動作多多，「咁大個女未去過，我一埋位就俾個荷官喝，『阿姐，呢度講手勢㗎！』，我俾佢一鬧，就好似啞咗咁，咁我就放一千蚊，劇組嘅錢嚟，好驚，最尾贏咗左三千蚊，我唔玩喇！原來真係好緊張。」
【十八年前的夢魘 】
講到拍鬼片、黑暗格局電影，林嘉欣拍過多部，也試過無法抽離角色，多年前《百日告別》時，戲中喪夫的情感，和現實中她父親離世的傷痛交織，「嗰時嘅感情，真真假假我都分唔到，比較難抽離。」人生最恐怖的一件事，也是拍片：《異度空間》，「其實拍完嗰部戲之後，我唔係好夠膽拍鬼片，可能係，由於哥哥最後(自殺)嗰件事啦；同埋，嗰段時間，唔知點解，我成日成身瘀晒，嗰時我有少少疑神疑鬼。拍鬼片，都係夜戲多，咁你個人又唔夠瞓，加上嗰時我自己一個人住，啱啱嚟香港冇幾耐，冇人冇物，又冇朋友可以傾訴，嗰時個狀態好怪，我好深刻，覺得好恐怖，我又唔係見到啲咩（鬼怪）喎，但到今時今日，諗起都打冷震、毛管戙。」
【瘋狂玩泥密密看書】
電影以詐騙保險做主題，林嘉欣廿五歲才買保險，對囡囡就一出世就做足準備，買定教育基金類保險，「啲女就一出世買，主要買教育個類，咁到十八歲就本連息拎返，好安全。」過去幾個月留家，接送囡囡上陶泥班，她更瘋狂愛上，IG上全是狂玩陶泥拉肧的相片，整花瓶、咖啡杯，『嗰女都問：媽咪你愛我多啲，定愛陶瓷多啲 。』」疫情期間，她和分散各地的媽咪、姐妹日日video call，互相接濟口罩，感情更親密。另一得着，就要數日日睇書，一次過掃清堆叠床頭一年多的兩三叠書，「我通常一次過開四、五本書，閱讀有一種感染力，有時有煩惱我會睇書，書未必畀到答案你，但睇完會好舒服。」
【神秘的忘年筆友】
除了看書，她亦愛寫信，每逢出埠工作或旅行，都會手寫明信片或信寄回家，「o依家啲人唔等得，但收信，你就會有一種等待、一種期待，咁幾好呀，人生裡面有啲嘢可以期待喎，唔駛吓吓即食。」早前有報導，林嘉欣有位由15歲開始互相通信的筆友，對方更住在德國，用打字機打字寫信。神秘人是誰？她親自開估，「媽咪嘅老公係德國人，我係同後父嘅爸爸通信，所以我叫佢 grandpa，佢九十歲㗎喇，所以點解佢用打字機寫信。前年，我帶我兩個女、先生去德國探佢，我啲女話：『媽咪，點解great grandpa係藍眼嘅？』我話，你唔好問啦，你婆婆係好風光呀，哈哈哈哈。」
採訪、攝影、造型：蘋果日報
髮型: Bart Choi @ il Colpo
化妝: Shuen Kong
服裝: Alexander McQueen Balenciaga
場地: K11ARTUS
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|