港姐今年因武漢肺炎關係，由實體轉為網上舉行，雖然大台堅持喺疫情中繼續保留呢個傳統選美活動，不過觀乎以往經驗，大台一有創新思維，下場都係衰收尾居多，合乎眼高手低嘅大原則。噚晚大台港姐首輪面試階段，前菜除咗有甩碌場面外，主菜同甜品當然係一班勇氣可加嘅候選佳麗，網民可以一邊剝花生一邊畀反應，直接得嚟又夠互動。
阿梅你見點呀
一出場嘅翁慧嫻，原本張相塊面白白淨，加上着住一條清純背心白裙，無疑加咗唔少分，點知出鏡嗰刻，打嘅鼻影出晒事，難怪網民話一開電腦俾佢嚇到個心離一離。另一個出事佳麗鄺靜汶，同樣因鼻影打得太深，加上唔識打光關係，皮膚一秒轉黑，仲有人話佢某啲角度好似陳柏宇，真係連呢期hit爆嘅變性App都可以慳番唔使玩。
無限復活
港姐呢個遊戲年年有，抱住「我心不死」嘅參賽者，今年都有好幾個，有網民就記得當中嘅陳美濤，喺2017年參選過，網民之所以有印象，全因陳佳麗棚牙夠閃亮同突出。另外亦有舊年參選過嘅陳慧欣，而佢亦係眾多佳麗中，着得比較疏爽嘅一個，除咗張相係火辣三點式，佢喺直播亦着住件低胸露肩衫，薑果然係越老越辣，不過有網民留言擔心佢「再谷會爆肺」，亦有網民提醒佢「見到塊墊」
極品雜錦
今次初選喺網上直播，好處係佳麗尊容一目了然，不過由於未經修飾就要見人，加上化妝技巧人人不同，結果就出現所謂照片同真人不符嘅畫面。其中落差最大嘅有盧海虹，相中佢戴住眼鏡，拎住紮花含羞低頭嘅佢，雖然old school咗啲，但夾硬講都總算有幾分清純氣質，點知真人一露相，頭髮稀疏滿臉油光，有網民就讚虹姐好勇敢，仲問佢同鵬哥盧海鵬有冇親戚關係。另外，甚有中女feel嘅許舒喬，就俾網民話面圓似pizza，豬膽鼻就似足麵包超人。
濾鏡美顏
美顏濾鏡App層出不窮，幾乎你諗得到嘅都有，噚晚就有唔少佳麗喺出鏡一刻，以濾鏡見人，其中郭栢妍，因為用咗美顏關係，皮膚完全唔見毛孔咁濟，而眼珠過大幾乎見唔到眼白，另一參賽者蔡小蝶，同樣用上美白App，不過喺港姐面試直播都要用上美顏App，一來有少少犯規，二來明顯對自己冇乜信心咁囉！
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|