31歲裕美戀上30歲林作爆「林美戀」，兩人背景相差天與地，林作畢業於牛津大學，家住半山麥當勞道豪宅，有package，網民笑林作儍夾蠢，林媽媽更落閘拒裕美於門外；裕美名字背後的黑歷史：失婚、偷食、會考零分、出身公屋令她成為箭靶，昨晚林作發千字文愛的宣言護花，得到男友力撐的裕美，今日戴着男友送的閃爆鑽戒接受《蘋果》訪問，落淚感謝男友愛護，更自爆有性冷感，她對着鏡頭隔空向林媽媽說：「有乜不滿隨時面對面同我講，我係會改善。」
回想第一次見面，裕美對林作印象非常之差，「因為佢個頭好奇怪，個子細小，講嘢非常之挑逗『你好靚！』我好唔鍾意，全程睥住佢，我唔想同佢講嘢。之後公司幾個飯局，又係成班人食飯，我哋唔同部門，佢永遠走過嚟我度，總之好鍾意坐你側邊講嘢。」口花花的林作，原來因為義氣兩字，成功追到裕美，「佢喺公開場合先會好有膽量講鍾意你，好情迷你，但私下冇搵我，所以我覺得佢根本係玩嘢，我更加唔鍾意佢為人。點樣開始？有幾次我有啲事情發生咗，佢第一時間出嚟幫手，有次我隻狗嘔蟲，我超級驚，佢即刻車我同狗去醫院，覺得佢個人幾好，幾有義氣。有次佢突然間叫我打畀阿媽約一齊食飯，當晚佢喺我阿媽面前講好多鹹濕笑話，我阿媽係笑得非常之開心，覺得呢個人好健談，慢慢我同佢傾多咗偈，到今日我哋都係超級多嘢講，由好好朋友變成情侶。」
林作對裕美一見鍾情，當日更講明要撬牆腳，最後裕美跟老外男友分手，但她就維護林作，強調他不是第三者，「唔係，你都知我鬼佬男友幾靚仔，係天同地比較，坦白講佢好多外在條件都唔係我夢中情人款，但佢所有無論性格、相處，我哋係perfect。我鍾意佢人好囉，林作係我遇過嘅咁多男仔裏面，係對我超級好，因為以前男朋友係皇帝，我係奴隸，我不斷服侍佢洗衫煮飯，日日按摩一粒鐘，但林作係非常之欣賞我，好鍾意我，我係公主，佢係奴隸，我第一次感受到畀人當公主去看待。」
入行多年的裕美，在情場身經百戰，緋聞男友一籮籮，經歷過離婚，被罵過出軌，「林美戀」曝光後，裕美的黑歷史成為網民攻擊目標，林作戥女友不值，「可能我個樣好蠱惑好姣，但其實我係唔姣，亦都係性冷感，我冇呢個特別需要、喜好，但啲人覺得我好花弗，坦白講我係冇媾過仔。」驚爆性冷感的裕美，被問到這方面是否跟林作協調到？她尷尬笑：「其實呢啲嘢唔係太重要嘅，哈哈哈！我自己冇強烈需要啫，我想澄清番啫，大家話我姣，但我根本唔係呢方面好有需要嘅人，人年紀大，哈哈！」
兩人拍拖大半年，前日公開認愛，男友寫下千字文愛的宣言，裕美好感動，「我喊得幾犀利，好多謝佢。其實我都問過佢鍾意我乜？佢咁好條件可以揀好多人，幾靚幾高學歷都有，佢話因為你人好，要搵到一個好人好難，坦白講我畀朋友呃過錢，林作用粗口話我戇x，啲人問我同佢一齊目的係乜？我話劫富濟貧。」提到男友的力撐，裕美情緒波動，眼紅流淚，「我除咗賣好人冇嘢好賣，感動佢會觀察到我呢方面，有時佢仲會叫我要自私啲，邊個蝦你要反擊，佢令到我勇敢咗，今日出嚟做訪問都係佢鼓勵我，因為一直我對評論冇反擊過，首先講失婚，我離婚時一蚊都冇收佢（前夫），離婚原因真係好唔夾，再加上對方真係有對我做出暴力行為。」
離婚後，「失婚」兩字變成她的姓氏，「失婚裕美」自嘲：「好多人歧視失婚，佢媽咪歧唔歧視我唔知，因為佢媽咪以前都係結過婚，我冇親自聽到佢話歧視，唔可以憑謠言去相信佢係咪歧視。離咗婚女仔唔係賣剩蔗，唔應該係有歧視行為。」裕美跟林作相處毫無保留，所以自己的過往都跟男友交代，「佢接受能力非常之高，我完全冇試過同一時間有兩條仔，你可以話我拍拖拍得密，拖接拖，但我係end咗先開始。」
兩人相愛，其他人的閒言閒語可以不用理會，但林媽媽卻不能不理，裕美指見過伯母兩次，「上年林作生日會請人上佢屋企，所以會見到，但唔多deep溝通，因為太多人，坦白講，你問我覺得佢媽咪點？佢媽咪覺得我點？始終未有好深層溝通，未了解對方本人，基本上冇乜嘢可以作出評論。」第二次見面，林作有用女友身份介紹給媽咪識，裕美平淡地，「佢冇反應喎，真係冇乜反應，feel唔到佢唔鍾意我喎，因為一大班人，唔會有乜特別反應。」
記者轉述林媽媽昨晚接受《蘋果》訪問，指唔知道阿仔跟裕美拍拖，她很愕然，「吓，佢唔會唔知啩！」林媽媽仲話未見過你？裕美堅定地，「哦，咁我講嘅係事實囉。」對於林媽媽指「我個仔以事業為重，玩玩吓唔使咁認真。」裕美嘗試為伯母解畫，「哦，可能佢仲係覺得林作係玩玩吓，你知佢之前都好多女。」記者再告之林媽媽話「冇需要介紹認識，阿仔應該唔係咁鍾意裕美！」裕美表現有點驚惶，「真係㗎？林作唔係咁鍾意我？我而家即刻打畀林作問吓佢先。」即時用手機致電林作，手都震了，強笑，「唔知佢係咪做緊嘢哦…佢聽唔到電話。」
裕美收線後，強顏笑，「唔會好hurt，佢都唔了解我，（睇手機林作的短訊）佢meeting緊。我諗伯母都好大壓力，唔知點應對記者問題，我諗伯母係唔想講太多嘢，我估佢係想平息件事，正常長輩會咁。我會努力做好自己，真心覺得自己人品做人處事對得住天地良心，我對人絕對真誠，就算話林作幾有錢，究竟佢有幾多錢我唔知道，有日佢話我比你想像中有錢，我話係咩，以為你有100億，跟住佢呆咗，我話你唔好用錢撻我，我好憎人用錢撻我，有錢唔係大晒。」
有男友愛的加持，給予裕美信心，不擔心林媽媽因為她的出身、學歷、失婚、偷食傳聞而嫌棄，「佢冇兜口兜面話唔鍾意我，我冇聽到。我唔擔心，如果林作因為佢媽咪唔同我一齊咪唔一齊，我冇所謂，咁睇吓你有幾鍾意我，如果你覺得我好，我做好自己就得。我唔會受任何人影響，我相信林作愛我多過我愛佢，哈哈哈！」
裕美不但有愛情滋潤，手上還有閃爆鑽戒，她坦承是男友送，是否求婚戒指？「佢同我求咗好多次婚，攞拖鞋、得閒攞咕臣，『求你嫁畀我』，同埋佢以前飲酒飲得幾犀利，飲咗會裸體，佢攞隻拖鞋求婚就係飲醉咗嘅時候，我話佢咁樣好差，唔尊重我，佢為此戒咗酒，真係講咗做得到嘅人，非常之欣賞。」雖然收了戒指，但卻未應承求婚，「我覺得起碼唔應該只係求一次，我覺得要認真再講呢啲。（望着鑽戒）佢送咗畀我，我覺得求其畀隻戒指我，幾時結婚隨緣，唔好強求，最好佢媽咪同意。」
單親家庭長大的裕美，雖然未得到林媽媽認同，但很尊重老人家，她對着鏡頭向林媽媽說，「希望佢身體健康，開開心心，相信你係好錫你個仔，我係完全感受到，所以我會好好take care佢，有乜不滿隨時面對面同我講，我係會改善。」
至於外間將她和林作舊愛十優港姐麥明詩拿來比較，裕美毫不在乎，「我從來唔介意，首先我好欣賞讀書叻嘅人，我對住啲字係呆咗，林作話我有少少讀寫障礙，我會考零分，但我18歲已比同年紀讀書嘅人賺好多倍。我欣賞林作因為佢係好謙虛嘅人，佢學歷好高口才好寫嘢好，佢真係冇歧視任何學歷唔好嘅人。啲人又話我出身寒微，我從來唔明白出身公屋有乜問題，林作有樣嘢好，我好鍾意食便利店叮飯，佢係同我一齊食，所以出身寒微唔代表一個人。」
場地：谷Stage
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
