梁詠琪（Gigi）2011年嫁予西班牙籍丈夫Sergio後，誕下女兒祈淑菲（Sofia）。Gigi主力照顧家庭，也不忘繼續為歌唱事業奮鬥，去年她加盟環球唱片，最近推出了加盟後首張揼本製作新碟《PRELUDIO》，是近年少有的實體唱片製作。日前Gigi接受訪問，她指碟名是西班牙語，意指「序曲 」 ，她說：「起初諗住用英文，最後就不如用西班牙文啦，等我老公開心吓。」
新碟封面以立體剪紙藝術概念印製，Gigi笑言已想到將囡囡的相片貼在上面，自製同框齊齊上封面，問她為何不索性帶同Sofia一同拍攝？Gigi笑說：「遲早都會。」Gigi直言現今賣碟概念比歌曲更重要，她說：「我而家有新角色，囡囡5歲，喺瞓覺前都會講故事，所以我以說書人嘅角色講故事，等大家日頭有歌聽，夜晚就同仔仔女女聽故事。」提到每晚為囡囡講睡前故事的習慣，Gigi說：「佢好鍾意聽，我唔只講，仲要有演技，講恐龍會扮dinosaur，講公主就要扮公主聲，做埋場戲，辛苦過拍戲，要好多take，老公講就會喺床度跳嚟跳去，個女會越嚟越精神，我就會令佢心靈平靜、舒服啲，容易入睡。 」Gigi更笑爆與囡囡、丈夫3人同床，現時的枕邊人是囡囡，她很喜歡說話，又會不斷重覆，Gigi已練成表面留心聽，心卻神遊他方，這就是Gigi跟囡囡的日常相處，相當有趣！
原來Gigi做說書人做上癮，近來有計劃與慈善機構合作，製作「說故事」系列，讓更多人能夠聽自己講故事。Gigi自認聲線溫柔，不過照顧小孩難免有令她動怒的時候，問她會否向Sofia咆哮？她說：「係好兩極嘅，曾經試過咆哮，不過我要養聲，又怕佢會學咗好惡嘅語氣，我都盡量保持溫柔，但要畀佢知有嚴厲嘅時候，做父母立場要好清楚，你唔做就要罰。我哋就冇試過體罰，而家嘅教育唔鼓勵亦唔需要，反而父母一定要有原則，口講有原則但實際係冇就唔得，呢樣係緊要過語氣。 」
而在教育女兒上，Gigi坦言跟丈夫也有共識，但總有意見出現分歧的時候，她說：「我係中國人，個女有少少發燒，我就覺得唔使太緊張，因為個女長大緊，瞓得玩得食得就可以嘞，佢係西方人思想，少少頭暈身㷫就要去見吓醫生，呢方面會有分歧，我會不停說服佢，呢個都係人生經驗，係學習過程嚟。 」
一直有意再生育的Gigi，再被追問此話題，她說：「Sofia見到人哋有BB，就會同我講又想要BB，真係俾佢嚇死！其實我哋試過好認真問佢，要佢點做，佢知道責任重大，就話要諗吓先，真係好笑。順其自然開頭幾年都好心急嘅，希望趁住未減肥就有第二個，不過一路忙住又冇乜聲氣，個女5歲，又諗到要從頭嚟過，唉，都唔知點，而家已經過咗好心急嗰段時間。」
採訪：羅慧敏
攝影：陳慧安
場地提供：柏寧酒店
髮型：Nick Lam
化妝：Circle Cheung @ndNco
服裝：Lane Crawford
來源 source: http://hk.appledaily.com
|
鍾意就快D Share啦！
|
|
|