2020年7月29日星期三

邁進唱作歌手路陳卓賢新歌《鯨落》動畫MV邀粉絲參與

Ian今次創作《鯨落》，原來是受到網上一篇文章所啟發。

組合MIRROR成員陳卓賢（Ian）完成電視劇《男排女將》拍攝、創立網店及組合的歌曲《IGNITED》宣傳工作，將於今天推出第4首個人單曲《鯨落》。為了要朝着唱作歌手之路邁進，Ian今次更首度譜寫曲詞，實行我手寫我心。Ian一直都想當唱作歌手，新歌《鯨落》首度由他親自作曲及填詞，坐言起行。《鯨落》的內容原來是Ian受到網上一篇文章所啟發，「有日喺網上睇到一篇文章，關於鯨落呢個生物學現象：鯨魚死咗之後會沉落海底，畀海洋好多養份，魚仔又會食佢。呢個死亡狀態聽落好悲劇，但背後造福好多生物同整個生態，聽完後好有感覺，所以就用呢個topic寫咗首歌，講述有時犧牲未必係唔開心嘅一件事。」

再次走進錄音室，Ian坦言今次演繹更見得心應手，「因為係自己寫旋律，所以未入錄音室已經好熟，歌詞自己寫更加知道當中意思，知道點樣投放感情，所以今次同監製確認好唱邊個Key後，好快錄好作品，前後只係用咗2.5個session，以前試過要錄5個session呢！」另外，由於今次的歌詞很有畫面，Ian錄音之後也曾幻想過日後在台上演出，要試將一些動畫投寫在自己的身上，那麼視覺上就像困在海洋之中；由歌曲到台上演繹都很充滿唯美的意念，更令Ian篤信只有動畫MV，才能呈現整個鯨落的故事，因而就有了《鯨落》動畫MV誕生。今次MV，Ian廣邀粉絲參與其中，他解釋：「上次《正式開始》用男友視覺拍攝，都係想同Fans有多啲互動，今次叫大家一齊畫畫，係因為當大家喺MV裏見到自己嘅畫作時，會更加開心、投入，甚至有同我一齊完成MV嘅感覺。」而是次網上招募更收到逾千份畫作，反應熱烈。

Ian雖然滿腦子都是在台上演出的好主意，但限聚令再度收緊，令與粉絲再聚的日子遙遙無期，不過Ian都不敢偷懶，早前在Gym房仍開放時，都勤勤健身，至於近日留在家中，他依然落力操肌，務求疫情過後，可即時以完美的體態跟粉絲見面。