調味料好整齊咁放喺櫃。
疫情嚴峻，依家全面禁堂食，唔少人都去超級市場儲定糧，煮得一手好菜嘅肥媽Maria Cordero，日前拍片帶大家去參觀佢超誇張嘅廚房，有成4個雪櫃，3個焗爐，9層高嘅地方放調味料，亦已儲定2個月食物足夠一家人食。
肥媽拍片上網，解剖佢嘅特大廚房，2個雪櫃擺落醃好咗嘅肉類、蔬菜、牛奶、蛋糕等，仲話仲有一個大冰櫃放咗喺出面，攞啲雪藏食物。又有一個小嘅雪櫃專放調味料。肥媽話因為經歷過1967年暴動，當時真係冇嘢食，自此之後都會放定1個月嘅糧，所以有大量乾糧罐頭、米、米粉、麵及意粉等，以備不時之需。
片中見到肥媽嘅煮食用具齊全，除咗2個爐頭、仲有唔同類型嘅電器，焗爐、蒸焗爐、食物風乾機等。又有大量煮食工具，幾十個暖水壺、烘焙用品及茶葉的櫃筒等。之後仲有一個9層高嘅櫃，櫃上面有不同大小嘅盒，放唔同嘅香料、花椒八角、芝麻、蜜棗、陳皮、片糖、雪耳等。肥媽教路要用盒擺好每一款食材，再貼上標籤，咁就更加容易搵。
來源 source: http://hk.on.cc
|
鍾意就快D Share啦！
|
|
|
