現年57歲的顧紀筠，人稱她為「顧老闆」，近年淡出幕前主理珠寶生意業務，手持過億物業，單是中半山嘉慧園連車位的中層單位，11年以8千萬買入，現已升至市值1億7千萬。顧紀筠投資有道，優雅富泰的風光背後，原來有段奮鬥辛酸史。
不做工廠妹
出身木屋區的顧紀筠，出世當日遇上超級颱風「溫黛」，她說：「因為颱風溫黛襲港，媽媽生完我出院後，間木屋已經爛咗。後來因為咁樣，獲安排入住八層高，天台有學校嗰種徙置區。」現在這一代，很難想像徙置區環境，一層樓住戶齊享用公用廁所，沖涼洗衫要離開住所，她說：「當時居住環境治安同環境比較差，每次去廁所都要屋企人陪住，因為發生過非禮案，喺呢種環境下，就算住喺屋企都會好恐懼同憂慮，所以自小已經有一種想法，好希望可以搬走。」徙置區長大，一家五口住在狹窄百呎居所，顧紀筠說，自從最小的弟弟出世，她的睡床就是由兩張櫈組合而成，到她長高超過兩張櫈的長度，每晚便要「打地鋪」，成長環境令她早已有「買樓」目標，立志脫貧！一家齊心為家庭打拼，顧媽媽唔識字，也決定隻身赴澳洲打工，在當地醫院做洗熨清潔。當時不過是12歲的顧紀筠，要擔起母親職責，照顧比她年幼8年的弟弟：「當年佢喺香港工作月薪大約千六元，而喺澳洲工作就有四千元，就算扣除當地生活費，都可以寄幾千元返嚟。佢真係好厲害，唔識英文，又唔係好識字，所以甚少寄信，但會寄卡式(錄音)帶返嚟，我好記得當時聽佢寄返嚟嘅卡式帶，半個鐘時間，我諗有一半時間係喊嘅，即係無嘢講，只係飲泣，因為覺得好辛酸同難受。」，爸爸在姑丈的工廠打工，為幫補家計，自小出入不同工廠的顧紀筠說，當時跟自己講，將來不要做「工廠妹」，努力上進改變命運。「我好唔想做工廠，唔係睇唔起人哋，不過我會覺得，希望自己有更好出路，自己就積極搵工。」她解釋。
凌晨4點起身返工
環境磨練驕人意志，會考結束後翌日，她立即去搵工。顧紀筠很幸運，遇上人生第一個伯樂 – 胡楓（修哥），她回憶：「修哥嘅發行公司聘請文員，我記得當時自己連打字都唔識，修哥問我識唔識？我話唔識，不過會努力學習。我諗修哥請我嘅其中一個原因，應該唔係牙尖嘴利，而係說話有紋有路，覺得放喺公司都唔會失禮人嘅。」在修哥公司工作了三個月，顧紀筠有日在街上被星探發掘，電視台找她參加《慧眼識新星》，當時胡楓加薪力挽：「其實我甚少發明星夢，因為知道自己係咩嘢材料，總之就係唔夠料。做文員工作時，月薪八百元，我記得三個月後，修哥加薪到八百五十元。但去電視台受訓，月薪已經有一千二百元，所以我覺得無論如何，都係賺多幾百元。修哥好好，畀我去嘗試，同埋唔需要辭職，所以我有兩份人工，當時二千元已經係好多。」當年19歲的顧紀筠思想成熟，她自言從不發明星夢，認為無錢就不應繼續做藝人。
於是，向來喜歡設計工作的她，由朋友介紹更成功珠寶櫥窗設計。
當時亞視前身的「麗的電視」賣盤商人邱德根，老闆的兒子找她回巢，因她在麗的年代做過兩年「表現不錯兼有少少知名度」，但當時已有一份設計正職，於是電視台給她負責週末及週日的節目。她說有六年時間，過着日打三份工，機械人式生活！
「每個星期六、日主持體育節目，朝早做早晨節目，朝九晚五嗰段時間就做珠寶工作。然後自己又經營一門生意，售賣custom jewelry，喺百貨公司有自家專櫃。所以每日都係不停工作，由瞓醒擘大眼，直至五點鐘收工後，再去百貨公司專櫃，百貨公司十點半關門，返到屋企十一點幾，就要即刻瞓覺，因為四點幾又要起身。」
猶太好友教路
一星期做足七日，完全無時間使錢，加上顧紀筠是個愛儲錢的人，便將儲起的錢開始買樓，買第一層樓的時候，只有廿一歲。「如果無記錯，應該係三十八萬五千，賣出時好似係四十六萬，位置係中環Soho一個好細嘅單位，我記得由出lift，第一步開始計算，十二步就已經坐喺自己張床上面，我係連公共走廊空間都計埋，走出lift門，行十二步已經坐喺自己張床，你話間屋大得幾緊要呢？」當年做珠寶認識不少猶太人，眾所周知猶太人計數叻，有位跟她分析指顧紀筠計錯數，無可能將一半以上的收入用來供樓；又指她這樣生活，沒能維持多久，很快便會崩潰。原來當時為慳錢，她上下班都選擇行路，又以麥皮代替正餐，間中才會加點煉奶。她說：「我話因為覺得供樓好重要，凌駕於所有飲食開支，當時我其實係行路返工，我會食麥皮，無論如何，我就捱咗第一層樓返嚟。之後因為自己都算搏命，搵咗好多份工作，開始買太古城，曾經喺太古城買過幾層樓，即係逐層逐層買，當我賺到少少錢，就再申請按揭買多層，需要供樓嗰啲單位又會放租。」如是者，顧紀筠由太古城轉攻半山區，她指自己不是個精於投資的人，可以樓換樓，是拜生在經濟起飛的七、八十年代！「好似而家咁，叫我上樓都好困難，我覺得自己幸運嘅係，我哋喺嗰個年代仲可以上車，而又肯捱。當時我真係好肯捱，本身好捱得，我覺得自己嗰種生活好似修煉一樣，甚少使錢。」
母女相對無言
無論是打拚回來獲得的財富，還是因為嫁得好而無憂。生活安穩多年的顧老闆，總會有些時候，在夜闌人靜為當日的辛酸歲月流淚：「我只會報喜不報憂，好少同媽媽傾訴，而家講起都想喊，我好少會同媽媽講唔開心嘅事，就算喺外面捱幾多苦都好。」她很記得當年一幕，她發燒不適很想回家，回家後，媽媽為她煮了一碗米粉。強如顧紀筠，現在說起來也忍不住飲泣：「當時坐喺度望住碗米粉，眼淚不停滴落嚟，媽媽連一句發生咩嘢事都唔敢過問。自己發燒好唔舒服，覺得捱得咁辛苦為咩呢？我覺得有時候好多事情，人生就係咁樣。而家回想就好似笑話，但當時覺得咁樣嘅歲月仲有幾長要捱呢？」顧紀筠的奮鬥人生笑中有淚，正如歌仔都有得唱，「懷緬過去常陶醉，一半樂事一半令人流淚，夢如人生快樂永記取，悲苦深刻藏骨髓…」採訪、撰文：肥A 攝錄：千平----------------------------
守住新聞自由 和你撐計劃每月$300起撐《壹》仔
按此了解更多
壹呼百應 號召有心人 請香港人睇壹週刊
按此了解更多
-----------------------------
【昔日紙本檔案庫】
30年壹仔經典 壹壹重現！
來源 source: http://nextplus.nextmedia.com
|
鍾意就快D Share啦！
|
|
|