林子博太太董燕君（Shirley）去年發現患上極罕有癌症「平滑肌肉瘤（腹腔）」，經半年治療至今年初有好消息，但近日病情突然告急，腫瘤劇痛入院治理。
子博化身帶子洪郎，今日他帶同仔女到荃灣出席朋友食店開張，和子女共餐。他透露太太病情仍然在等消息，暫時未能出院：「知道佢又暈又嘔，好痛又冇胃口，醫生噚晚同佢照腦，而家等報告，我透過視像同WhatsApp同太太溝通。」一對子女可能未太意識到情況，子博也不想令他們擔心：「細仔會打爛沙盤問到篤，媽咪幾時返屋企，但大女就比較沉默，佢哋會視像同媽咪溝通。」
子博轉述太太病況稱：「醫生話要觀察，由舊年接受過化療後都冇再做任何治療，今年7月試咗隻新標靶藥，因為太太話胃頂，肝酵素偏高，檢查之下腫瘤有發大，同埋少少轉移其他位置，建議食標靶藥。」現時要支付兩萬元一個月藥費，子博說：「本身隻藥係納入醫療安全，用作醫腎病就可以用一個平價去用，但用喺我太太身上因為屬另一種病，就要用好貴價錢去食，其實都係同一種藥，覺得唔太合理。」不過因服用後副作用太大，導致太太整個人唔舒服、冇胃口，腫瘤更痛，最終還是停藥，子博心痛說：「痛到落唔到床要扶佢，所以留醫在醫院反而我會安心啲，唔放心兩個小朋友睇住媽咪，跌親點算。」
疫情關係子博不能到醫院探望太太，昨日他收到姑娘電話：「太太唔開心，情緒好波動，因為擔心出唔到院，醫院已經開咗嗎啡水比佢飲，減輕痛楚，建議我同佢講多啲電話。」
除了顧及家庭子博亦要努力工作搵錢，最近子博和馬浚偉用視像綵排舞台劇，以及和仔女開拍有線電視真人騷，在安全許可情況下會帶同子女開工。面對太太龐大醫療費，及租屋要養育一對子女，子博無怨無悔一力承擔，幸好之前份工有長期服務金，經濟仍能撐住，並說：「總之老婆好就乜都得，其他唔係難題，以前太太俾人蝦，我可以為佢出頭，小朋友喺學校有事我可以搵老師投訴，但今次呢個病我咩都做唔到，好多嘢我做得唔夠，照顧得太太唔夠好，希望有奇蹟出現。」
-----------------------------
打國際線 《蘋果》英文版免費試睇按此了解更多
英文版已登錄新版《蘋果》App按此下載/更新
來源 source: http://hk.appledaily.com
|
鍾意就快D Share啦！
|
|
|
