人總需要勇敢生存，面對武漢肺炎疫情反覆，各行各業亦受史無前例的衝擊，而收入本來已經沒有保障的藝人，面對目前的社會環境，演藝界幾乎全面停頓，有人靠積蓄過活、有人轉行、亦有人趁機增值自己；至於疑因為勇敢表達政見，最終不獲大台續約的「SiS樂印姊妹」組合成員駱胤鳴，原來亦早有打算，最近更成功考獲寵物美容師牌，為將來鋪路。
駱胤鳴日前在美孚接受《蘋果》專訪，處於「失業」狀態的她仍然樂觀，她笑謂：「靠老公養囉，不過我唔會即時坐食山崩，自己又唔大使。工作係少咗，但係全行都受影響，之前已經諗住讀寵物美容，同TVB完咗約，更加要腳踏實地去實行，唔好局限自己，因為自己真係鍾意。」她指學寵物美容與疫情無大關係，只想為自己找副業：「好彩麥美恩教我要儲錢，搵到唔好使晒，要畀個保障自己。其實唔只係呢一行，好多人都有副業，暫時我經濟上冇壓力，我同老公都覺得夠用就OK，佢又冇叫我快啲搵工，仲話呢個時候唔急，健康緊要過搵工，我自己都有擔心嘅，平時有時間咪上網格價，睇吓邊度買嘢平啲，好似師奶咁。」
駱胤鳴花半年時間考獲寵物美容師C級及B級牌，有意將來開寵物美容店：「原本都唔係諗住做，但係學完又覺得真係有興趣，長遠啲諗會想開舖，當然都要等疫情過咗先。」專訪當日，她邀得model狗波波及黑豆，為牠們梳毛、剪腳底毛及修剪毛髮扮靚靚：「我自己本身有兩隻貓，以前幫佢哋沖涼好似打仗咁，而家輕鬆好多，知道個步驟同埋最緊要冷靜。」駱胤鳴笑言自己的貓貓及朋友的寵物都成為練習對象，實習至今畢業已數不清「經手」多少寵物：「最高峯每日處理3、4隻狗，最大我做過拉布拉多，最細係約瑟（爹利）。」
要成為專業的寵物美容師，駱胤鳴有私家工具幫貓狗扮靚：「要有靜電梳、彎剪、直剪、牙剪呢啲基本工具，唔可以同要處理嘅寵物太熟，如果唔係佢會扭計。」
另外，提到原定年底結婚，駱胤鳴直言：「唔知點搞，要睇個政府點啦，原本七七八八，而家變返六六七七，日子就定好晒，12月27日喺科學園，我連12人、8人同4人嘅座位表都有晒。不過原本諗住去英國影婚紗相，而家要喺香港影，最壞打算係延期，不過我哋都會簽咗紙先。」
採訪：盧妹
攝影：林賓尼
場地：Petstival 寵藝坊
來源 source: http://hk.appledaily.com
|
鍾意就快D Share啦！
|
|
|
