唱家班呂珊，喺疫情底下，都跟潮流玩網上直播音樂會，仲不定時請來圈中好友做嘉賓，除咗一齊jam吓歌之餘，仲會傾吓偈Chit Chat吓。
東姑睇咗早前一集，呂珊就請咗安德尊（大王）及麥長青（麥包）做嘉賓，喺節目中，呂珊同大王仲互爆大鑊添。原來兩人識於微時，兼夾老友鬼鬼，呂珊就率先爆大王為人自我，喺三十幾年前，兩人一齊登台走埠，諗住大家年青人，做完嘢就搵埋大王出去食嘢、飲嘢聯誼吓，點知敲極大王酒店房門都冇人應，再擒高喺氣窗望入去，原來大王喺度大覺瞓。於是，呂珊就將清潔用品、地拖、餅罐、水，都由氣窗掉入去大王房，實行大整蠱。
跟住，大王繼續數呂珊嘅百厭嘢，話說有次佢哋一齊去中山登台，大王沖沖下涼突然冇晒水，一身濕晒先發現又畀呂珊整蠱。原來呂珊喺房外閂咗個水掣，嬲大王匿埋喺房唔應門。後來，大王打開房門，鬼馬嘅呂珊再將啲洗頭水、梘液唧喺大王嘅身上，搞到大王周身泡。不過，大王好玩得，通常開完玩笑都唔會嬲。
呂珊再樂此不疲，繼續爆大王秘密，佢話大王份人亦唔鍾意覆短訊，通常事隔好耐先會收到大王嘅回覆，而且仲要係半夜三更，凌晨三四五點嘅時間。佢又透露，大王有一個騎呢習慣，如果無綫有通告朝早七、八點開工，大王就會揸車提早喺四、五點，去到電視城附近stand by。呂珊笑佢傻得嚟，其實好敬業樂業，怕自己家住元朗山長水遠有乜阻滯，所以先提前出門。
唱完歌，呂珊再出招爆大王秘密。如果大王有朝早七、八點嘅拍攝通告，佢竟然早到四、五點，已經喺公司附近stand by。
講起當年後生時，經常整蠱大王，呂珊自己都忍唔住笑到肚攣。
呂珊、大王識於微時，兼夾老友鬼鬼，一見面即互窒對方，並且互爆秘密，場面惹笑。
來源 source: http://eastweek.my-magazine.me
|
鍾意就快D Share啦！
|
|
|