【亞洲首個】開虛擬「紅館」騷 C AllStar賀成軍十周年
為慶祝 C AllStar 組成十周年，四子陳健安（On仔）、梁釗峰（釗峰）、吳崇銘（King）和何建曦（Jase）將破天荒，在 8 月 28 日合體舉行亞洲首個虛擬和實景結合的網上互動《Make it Happen @10 - C AllStar Virtual Live 》演唱會，一向有玩網絡遊戲的四子形容，當知道有機會在虛擬「紅館」做演唱會時，心情比之前他們任何一個演出都更緊張更興奮。最開心的是，網上售票開賣反應熱烈，短短幾日銷量已突破九成。
四位成員連日來努力綵排，練歌之餘更需熟習與虛擬實景配合，成員On仔說：「呢個網上互動演唱會，意念好玩又創新，除咗係亞洲首創之外，製作單位重還原咗紅館嘅四面台舞台設計，我哋又有自己嘅虛擬角色，可以喺台上台下自由活動，鍾意就可以跳落台同觀眾互動，而大家亦可以見到多角度嘅紅館，唔係你坐邊個位，就只係睇到嗰個角度嘅嘢。」
保證四子現真身
C AllStar 自 2017 年起休團至今已三年，對於這次「十週年限定重組」合體演出 ，四位成員當然滿心期待，釗峰綵排時笑言：「今次唔使騷肌肉，準備好大家嘅電腦就得啦。我哋為咗今次十周年演唱會，會將一啲歌重新編排，係八二八特別版，大家一齊好好慶祝，搵返大家熟悉嘅回憶，同時準備一齊開開心心玩呢隻game。」
DJ King説：「我好鍾意玩呢個game，因為可以自己砌嘢，好似砌 LEGO咁，好開發思維，我最喜歡新實驗、新嘗試，好期待自己可以喺遊戲入面打碟並跟粉絲互動。」
SoulJase補充説：「雖然係破天荒嘅虛擬演唱會全新體驗，但保證會見到我哋真人演出，唔係只有虛擬人物，相信會為網絡玩家帶來一場難忘的演出。」由於當晚演出將結合音樂、電玩、直播及電商元素，為了增加觀眾嘅真實感，屆時玩家需要憑票及探熱進入會場，門票不劃位，座位「先到先得」。如果觀眾有過激行為將會被「場內保安」請離場館。
SoulJase 解釋：「製作團隊耗時3 個⽉精⼼打造《超級星光⼤道預熱⼩遊戲》，還原真實嘅尖沙咀街道、鐘樓、天星碼頭、文化中心、太空館、1881 等極具代表性的建築物，屆時會於虛擬世界重現，大家可以喺『尖沙咀』邊逛邊尋寶。已經買飛嘅觀眾可以由即日起進入『尖沙咀』用最短嘅路線搜到最多嘅寶物，換領由各合作夥伴送出的禮品。」
|
鍾意就快D Share啦！
|
|
|