同兩歲兒子開30人生日P 張震嶽High爆伸脷
46歲的張震嶽同老婆小涵拍拖7年，18年9月初為人父母，一向熱愛戶外運動嘅張震嶽最鍾意帶埋個仔去行山去海邊玩，有時又會同老婆去露營享受二人世界，生活相當寫意。曾經講過唔識同小朋友溝通，不過一有時間就會孭住囝囝同帶住愛犬出去曬太陽呼吸新鮮空氣。
上周係張震嶽嘅餅印囝囝小谷沐嘅兩歲生日，呢位老竇好有心，叫埋大班朋友，有大有細返屋企開生日Party，咁多人一定好嘈，最難得冇限聚令又唔使戴口罩，一班大人同細路玩足一日，最重要間屋夠大，可以喺屋企一角Set個汽球池，一班小朋友喺入面玩到癲晒，鬼殺咁嘈，張太拍片期間，張震嶽更笑晒伸晒脷入鏡，仲忍唔住舉起Rock And Roll手勢。呢位有型老竇話囝囝玩咗成日，夜晚九點沖完涼即刻瞓著，而佢亦跟住瞓咗，不過張太厲害，「剩下媽媽們續pa到凌晨兩三點！」
來源 source: http://hd.stheadline.com
|
鍾意就快D Share啦！
|
|
|
