政府不封關，武漢肺炎在過去半年反覆爆發，民生尚未能返回正軌。除了各行各業大蕭條，學生今年返學日都大受影響，農曆年假後便停課多月，及至5月疫情暫緩，特首林鄭月娥宣佈中小學和幼稚園在5月底開始分階段復課，可是學生們返回校園才一個月，疫情又復熾，7月即再宣佈提早放暑假。
莘莘學子今年放假多返學少，但還是順利升班，無奈疫情難控，政府至今還嚴格執行限聚令，9月1日即使如期開學，學生亦只能留在家進行網上授課。教育局局長楊潤雄昨日宣佈全港學校將會在9月底分兩個階段復課，第一階段9月23日，復課年級為中一、中五、中六，小一、小五、小六及幼稚園高班；而中小學及幼稚園的餘下年級將會於9月29日復課。
其實有些星二代就讀非傳統學校，他們8月底便陸續開課，學校也要求在家上堂的學生要穿上整齊校服，年齡較大的學生對網上授課可能較專注及易適應，相對太年幼學生會較難集中精神，可能家長就要多費工夫從旁指導。
「圈中多仔公」林盛斌（Bob）的四名子女，3歲孻仔Jaye今年讀K1，快將6歲的三女機機升小一，12歲長女霏霏就升中一，家中三個小孩都在疫情下的新學年「開一」，卻未能到期待已久的新校上課，Bob日前接受傳媒訪問，表示不擔心子女不適應：「佢哋要隔多一段時間先可以正常返學，面對新環境，認識新朋友，不過小朋友適應能力好強，應該唔算太大問題。功課方面，太太過去幾個月有安排網上課程同埋教學練習畀子女，加埋我呢個地上最強補習老師，佢哋好乖完成晒。」
對於子女今年的避疫暑假，未能有暑期活動放電，Bob都受疫情影響要停工，變相多了時間留家做湊仔公：「相處時間多咗，今個暑假應該係我陪佢哋最多嘅一次，小朋友冇得外遊，梗係爭啲，睇吓遲啲聖誕或新年有冇機會補番數。」Bob的四名子女日前都已陸續開課，三女一齊在豪宅中的溫習室網上上堂，她們都很專心，升中一的長女霏霏期待返新學校：「Zoom上堂睇到眼好攰，又冇社交，今年我升中一，期待可以識多啲朋友。」二女熹熹貪其自由度大，坦言喜歡用Zoom上堂：「一放學就可以同屋企人玩，喺屋企返學，鍾意食嘢就食嘢，鍾意去廁所就去廁所。」升小一的三女機機則說：「返學可以見到好朋友，Zoom就可以睇iPad，兩樣返學形式都鍾意。」Bob嫂Pearl表示停課期間會給子女居家學習時間表，讓他們養成規律。
黃婉曼（Icy）的3歲長女Kyra，年初時受疫情影響停學半年，因為不少家長退學，令到學校沒經費要執笠，Icy早前狼狽地為囡囡急搵新校讀K1，日前接受《蘋果》訪問時說：「舊學校執咗，幾個月學費冇咗，連按金都冇埋，新學年轉新校，暫時只能Zoom上課，始終佢仲細個，我每朝要陪佢上堂，睇Mon玩遊戲同唱歌，上堂好過佢自己一個人喺屋企玩，小朋友美中不足係欠缺群體生活，新學校好好，只收一半學費。」
區永權就讀小學的兩子也已開學，雖然兩兄弟夠獨立，可自己網上上堂，不過區永權每朝都陪太子讀書，主要是隨時可做囝囝的IT後援。兩子表示掛念同學，9歲多長子Aidan說：「疫情下咁返學都好，否則全日戴口罩好侷，屋企上堂，放小息可以食鍾意嘅食物，好似pizza呀! 」8歲弟弟Ambrose則說：「兩樣返學都好，不過喺學校就可以走嚟走去。」
岑潔儀的長子Damian今年升小一，他由幼稚園生變小學生，本來十分興奮，卻撞正武漢肺炎未能返新學校，Damian日前就在家中開學，校方非常貼心，特別拍片帶新生參觀校園，Damian專注聽着校長和老師介紹校內情況及設施，到上體育課時，他又透過屏幕上堂，跟着老師做出動作。不過相片中，Damian卻一直穿着家居服，岑潔儀回覆《蘋果》時解釋說：「其實要着校服嘅，但我連校服都買唔到，因為冇得試，唔知啲size，而家都未買到。」
港姐張嘉兒即將4歲的長女劉在芯（Leora）今個學期升K2，她8月底便開課，卻要隔着電腦見老師，未能返校與同學一齊學習，她不太開心：「我掛住返學。」張嘉兒也困身陪上堂：「始終呢個形式上堂，小朋友趣味冇咁多。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
《本土情味》結集《飲食男女》雜誌經典欄目「老字號」文章，記錄香港40家飲食老店的動人故事，見證香港飲食史的甜酸苦辣。即日起，於各大便利店及書報攤有售，並於《蘋果日報》你的優惠網上獨家發售！
來源 source: http://hk.appledaily.com
|
鍾意就快D Share啦！
|
|
|
