2020年9月1日星期二

網上向林宥嘉自薦促成合作　　林家謙自爆寫歌專登「陰」JW #JW #林宥嘉

網上向林宥嘉自薦促成合作　　林家謙自爆寫歌專登「陰」JW

林家謙在節目中透露跟林宥嘉和JW的合作關係。

J2《我們的音樂時代》新一集主持許文軒（Edmond）邀請林家謙及JW（王灝兒）任嘉賓，JW與林家謙關係密切，由家謙作曲，JW主唱的《矛盾一生》更成為二人最廣泛播放的歌曲。家謙笑說：「當時諗如果呢首歌可以賣畀天王天后梗係好」JW即時起哄說：「唉！死要賣畀JW，佢Dup咗！你使唔使Google下我係邊個？」家謙再說：「知道JW要咗，冇特別大嘅Expectation，因為佢嗰時靜咗排，加上又收得太埋，我真係要Google下JW個樣㗎！最後首歌跑出，但呢個三部曲頭兩首都係一早作咗之後賣畀佢，但最後一首嘅《自由飛翔》係度身訂做，專登陰JW。」JW即說：「首歌真係好難唱，半度半度轉Key，真係錄咗好耐。」

節目中，林家謙亦分享他與台灣歌手林宥嘉的關係，「寫歌畀林宥嘉係因為佢係我偶像，我喺社交平台Send咗Demo畀佢，好似見工Send CV咁，你唔會諗住間間都覆你，但佢真係覆咗，好記得當時我喺灣仔食緊一碗麻辣米線，收到佢Message果下想噴出嚟。」而林宥嘉亦現身節目，「我本身唔識佢，收到Demo之後，覺得佢好畀心機寫歌，把聲好溫柔，旋律有一種拿住拿住嘅感覺，所以我回覆佢想同佢合作。」家謙亦有提到林宥嘉第一首廣東作品《壞與更壞》亦出自他手筆，「首歌出前幾日我先知道係廣東歌，寫嘅時候諗住兩個對象，一個係林宥嘉，另外一個係陳奕迅，因為佢哋兩個把聲有個共通點，就係有一種好自然，直接由心唱出嚟嘅感覺，我就用咗呢個聲線嘅方向去寫。最後首歌林宥嘉唱，而其中一位監製係陳奕迅，實在好驚喜，好夢幻，因為兩個對象都喺同一首歌入面出現。」