譚炳文上周六因肺癌與世長辭，其女兒譚淑瑩今日下午約2時45分到紅磡殯儀公司為爸爸辦理身後事，連日來為父親後事四出奔走的她，臉容略顯疲累。
逗留約半小時，瑩瑩在殯儀公司外接受訪問，她透露日前已安排好爸爸的棺木：「今日主要嚟揀花圈，我想屋企人嗰啲都可以歸一啲、整齊啲，不過多數都係心形同馬蹄形，而家仲揀緊。」瑩瑩亦帶多套衣物給爸爸陪葬，包括有用作壽衣的西裝、炳哥平日經常穿着的夏威夷恤衫：「仲有件羽絨jacket，係我同喺美國嘅哥哥一齊送畀佢嘅，佢成日都着住去好多場合，另外仲有支佢成日聞嘅油，不過殯儀公司嗰邊話唔可以放油，到時會灑啲落去。仲有啲鞋襪，自己都冇諗到要準備，遲啲再拎嚟。」
至於炳哥的遺照，瑩瑩表示已選兩張，由協助她處理後事的無綫安排：「因為到時場刊可能都用同一張相，所以等公司揀。」至於會否安排追思會？她說：「我想一日搞掂哂，即係設靈同追思同一日就得，唔會特別做追思會，而家疫情又唔可以公祭，座位都要隔開。」
提到阮德鏘於社交平台公佈炳哥將於9月21日在紅磡世界殯儀館設靈，瑩瑩說：「阮德鏘，我叫佢細佬嘅，開頭嗰陣，係爸爸教佢做司儀，所以粵劇嗰邊嘅朋友，我就叫佢通知，我都唔知佢會打出嚟。」她指要視乎當日是否有焚化爐，因此設靈日期仍待確實。
瑩瑩感謝圈中前輩、朋友的慰問：「阿姐（汪明荃）、家燕姐、寶珠姐都有打嚟問候，好多業界前輩、爸爸嘅同事，淨係message都過千個，有時真係睇唔哂。」問她心情是否較平復？瑩瑩指看到大家的慰問，仍會忍不住落淚：「我想藉呢個機會感謝所有親友、朋友同fans。自己係佛教，都有師傅幫爸爸誦經，原來好多世界各地好似馬來西亞、美國等等嘅fans，都有幫爸爸誦經、供燈，甚至打齋，真係好感激佢哋，大家都好有心，呢個幫忙好大。」瑩瑩直指身後事只是做給在世人看，但誦經才可以令先人最得益：「幾年前知佢有心臟病，我已經幫爸爸誦經，7月知道佢有嗰個病都有佈施，好感恩爸爸喺最後嗰段日子都明白佛理，呢樣令我比較釋懷。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
來源 source: http://hk.appledaily.com
|
鍾意就快D Share啦！
|
|
|
