2020年9月9日星期三

丈夫過身鮑起靜羅蘭借錢渡難關　吳浣儀靠拍劇還債養大仔女 #吳浣儀 #羅蘭 #鮑起靜

丈夫過身鮑起靜羅蘭借錢渡難關　吳浣儀靠拍劇還債養大仔女

浣儀姐接受苑仔訪問，仲自爆曾跟羅蘭和鮑起靜借錢。

吳浣儀日前應好友苑瓊丹邀請，亮相香港開電視節目《開工大吉》，暢談多年演藝生涯的點滴。浣儀姐話其實年輕時「喜愛夜蒲」，更即席向苑仔示範舞，：「苑仔話我嗰樣老老實實，但佢唔了解後生嘅我，當年我都係會周圍玩，收工要去『蒲』㗎，去飲嘢、跳舞之類，跳得好勁𠻹，我係鍾意去玩！年青時有人讚我幾靚，加上讀書時有做過舞台劇，覺得自己鍾意做戲，見到電視賣廣告，又冇咩做咪試吓考訓練班，諗住唔得㗎，點知又過晒關，所以話真係整定嘅！」

浣儀姐直言入行初期，出演閒角扮茶客，兩個月後便接拍有份量角色迅速走紅：「因為我以前又曳又惡死，所以角色都叫做番我自己，好自然就發揮到囉！去到1975年我因為『嬲』而離開電視台，當年都算年輕，做咗兩年突然搵你做啲閒角，加上唔小心NG就會有說話聽『唉，冇船過海』而我又剛開始拍拖，咁咪唔鬼做囉！」她表示愛情成為離巢推動力，令她衝動到拒續約，「當年另一半都冇話養起我，但拍極都係閒角，由朝等到晚都未埋位，阻住我拍拖嘛！總之都係任性啦，做嘢冇諗過後果，跟住就轉咗去佳視，點知最後執埋，咁我咪走去結婚囉！」直到丈夫患病，一邊照顧家人，另一邊廂拍劇養家，成為浣儀姐人生最艱辛的日子，「當時真係唔做唔得，仲要問鮑姐（鮑起靜）、羅蘭姐借錢過難關，要拍劇還債！不過我好得意，自身嘅事唔會點喊，要面對囉！後來丈夫過身，好在一直都有戲拍可以養家，當時好忙都冇時間理啲子女，但好在佢地𠵱家都好OK！」