若說黃錦燊是人生勝利組，應該不會有人反對吧！
高大有型又高學歷，既是藥劑學博士又是英國法律學士，一入娛樂圈已做男主角，年屆71頭髮仍又濃又密，而最最最令全世界男人羨慕的，是娶到個靚老婆，仲要係當年至靚至紅嗰個。
娶趙雅芝可會是人生最大收穫？
「又冇咁諗過，緣份呢樣嘢好順其自然。」黃錦燊日前接受《蘋果》專訪時說。
美國長大的黃錦燊，1976年放棄藥劑師高薪來港拍戲，1981年跟無綫當家花旦趙雅芝拍攝劇集《女黑俠木蘭花》時戀上，3年後拉埋天窗，生下兒子黃愷傑。過去幾十年，經常見到夫婦十指緊扣出席各大小場合，恩愛非常。
談夫妻相處之道，黃錦燊笑說：「兩公婆冇嗌交一定呃你，大家接受到唔同人對事件有唔同睇法，你咪盡量去了解對方睇法囉，講出自己睇法，接唔接受另一回事。讀過法律，喺法庭辯論過，你會有心去分析一樣嘢，做法官都聽兩邊唔同版本，先去決定邊樣合理啲、邊樣接近真相，做人都係啫。」
別以為黃錦燊一味講道理，偶爾他也會製造浪漫驚喜冧老婆。
「女人係要𠱁㗎，表示自己心意係應該嘅。」就好似當年趙雅芝長時間在台灣發展，黃錦燊便經常飛到台灣探班，錫老婆錫到燶。
65歲的趙雅芝像食了防腐劑，歲月不曾在面上留下痕迹，而黃錦燊，71歲依然有型有格，風度翩翩，就跟當年他在經典劇《山水有相逢》中風流倜儻的靳玉樓一樣。談養生，學過跆拳道也學過詠春和洪拳的黃錦燊說：「運動由讀書到而家都有做，飲食少鹽少糖少油，保持開朗心境。」
當年黃錦燊在《山水有相逢》周旋於李司棋與黃韻詩之間，拍戲拍劇演過無數情場浪子，花花公子形象入型入格，但偏偏現實生活中，黃錦燊幾十年來都是「零緋聞」。太太經常出埠工作，沒有「飛來蜢」撲埋身，實在很難叫人信服。
「麻木咗囉！咁多年喺娛樂圈，乜嘢靚女未見過！（最靚嗰個都娶咗？）咁咪係囉！睇你對婚姻睇法，互相尊重，兼顧對方感受，你就唔會行差踏錯。結婚前我已經做晒要做嘅嘢，交好多女朋友，拍過好多次拖。」
從影以來，黃錦燊電影作品過百部，但也未及一部《真情》打動觀眾，今時今日，大家仍會記得好姨薛家燕的大情人「貓屎」，就連黃錦燊也最喜歡《真情》：「拍得好開心好輕鬆，每日朝九晚五，準時返工放工，晚上仲有時間讀法律學位。」
演有型有格的大情人，黃錦燊全靠睇《教父》和《鐵金剛》電影取經，模仿馬龍白蘭度和007。不過，演唔難，講對白才是最難。
「同期林子祥同我出晒名，揸住劇本周圍問人呢個字點讀，係乜嘢意思，我哋兩個啲中文都麻麻。當初睇得明只有三分一，其他都要問，又要拼音。」
跟林子祥相似的，還有留了超過半世紀的鬍鬚，黃錦燊認為自己面型適合留鬚，所以一直保留。記者笑問可曾為藝術犧牲剃掉，黃錦燊指當年自己與岑建勳同共監製、陳欣健執導的《平安夜》是唯一一次，他重提當年被騙時似乎仍有點嬲嬲豬：「岑建勳同陳欣健夾埋呃我，話個角色要剃鬚，唔知點解要我剃咗鬚，一剃咗之後，我睇過片（playback）就反抗，開始留返少少鬚，根本冇必要。」
黃錦燊1999年由演員轉職大狀，直至2018年重投演藝工作拍攝大台劇《多功能老婆》，而近日ViuTV新劇《熟女強人》中，黃錦燊更與兒子黃愷傑做情敵爭吳家麗。黃錦燊透露最初劇集是找兒子黃愷傑演出，後來知道他復出便邀父子檔合作。黃錦燊笑說：「佢（黃愷傑）細個我帶佢去片場，而家佢大個帶返老豆去片場。」
會否重返法律界？黃錦燊斬釘截鐵說：「做大狀唔會喇，個制度轉得好快，法例又改緊，同我兩年前退落嚟有少少唔同。我返出嚟拍戲好開心，見返好多年輕同事，跟啲後生學嘢，我都當自己係新人，每日埋位都學緊嘢。」
採訪：戴彩煥
攝影：陳俊強
攝錄：廖達燊、馮嘉銘
場地：Harlan’s (The ONE)
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|