小肥今年勇敢自揭出櫃後，不單大方公開戀情，更舒心地無所不談，不再刻意向外界隱瞞身份及性向。今晚他首次以粉紅大使身份，連同林二汶、馮允謙、陳蕾到九龍灣出席《一點粉紅》網上開live活動。
「出櫃」後令小肥變得輕鬆，之前他曾獲邀出席類似活動，但因身份未向公眾交代，有所避忌而婉拒了，相反今次卻可以兼任大使，他說：「反正孭咗責任在身，以前想發聲未必方便講，而家大條道理去講，又或遇到不公平眼光對待，會為大眾發聲。」幸好小肥無論宣告出櫃前後均沒遇上歧視，不過偶爾在網絡平台會遭「口痕友」攻擊，意見尚算正面，小肥並不介意：「口痕友無處不在，自己算係百毒不侵。」並多次揚言現時咩都講得。在疫情下小肥和身處台灣的另一半接近1年沒有見面，這段異地戀受到考驗，小肥說：「大家靠apps維繫感情，我都係第一次異地戀，乜都試吓，有時都有心淡感覺，好彩每到嗰個時候佢都會發功氹返我，我好易氹㗎。」小肥另一半7月生日，他親手畫畫傳送給對方。
林二汶第二年出席活動，難忘曾經因家中沒有粉紅衣服，於是買了一條螢光粉紅短裙，內裡加上legging配襯，做到一點粉紅效果。因疫情關係活動要在網上舉行，二汶有感可惜未能與現場觀眾見面，但總比疫情最嚴重時好，在這段時間不少身邊朋友發福包括自己在內：「困住就特別想食雪糕，我距離最瘦一直都肥緊，所以我係無死角女星，漸變成圓形。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|