「蘭桂坊之父」盛智文（Allan Zeman） 做生意高調瞓身，曾為谷宣傳扮壽星公、扮水母，古靈精怪在所不計。這位傳奇商人對家庭事卻非常低調，絕不張揚，他其實有位中非混血新抱Melinda Zeman (何永嘉)，更和盛智文一樣熱愛香港，「蘭桂坊新抱」第一次接受傳媒訪問，以流利廣東話：「 香港就係我屋企，我無計劃移民，因為我相信香港嘅未來！」
「蘭桂坊新抱」Melinda Zeman一周五天都在蘭桂坊食飯，訪問當日中午，一行出大樓就撞到老爺盛智文在地頭巡店，對生意全不鬆懈。盛智文是德國出生、移民加拿大，再落籍香港的猶太人，新抱Melinda同樣是地球公民，爸爸祖籍非洲迦納、英國居住，媽咪則是香港人。「我英國出世，五歲嚟咗香港，響呢度長大，香港對我嚟講，覺得就係我屋企。我好鐘意香港，覺得真係好方便，無論係食嘢、交通，人嘅思想方面都幾 open-minded，好friendly。響美國讀大學時，真係好掛住香港嘅廣東菜。」Melinda典型外國人樣子，一開口的純正廣東話，經常令人嚇一跳，「係呀，好多人聽到都覺得好搞笑。其實我仲好鐘意睇古裝片，睇過好多，數之不盡，細個嗰時啲嘅 《還珠格格》呀、鄭秀文拍個套好似叫咩《大頭綠衣鬥殭屍》，最近嗰啲我記得，好似《甄嬛傳》呀、《如懿傳》呀，我都有睇。」
睇古裝宮闈劇，人人追睇後宮如何為爭寵勾心鬥角，Melinda就專睇妃嬪戴的打扮，「宮入面啲女人，戴住啲好靚好靚嘅首飾，覺得每件首飾都可以帶出人嘅唔同個性，成件事好有氣質。」在美國南加州大學傳媒系畢業後，Melinda 打了幾年工，2009年嫁了給盛智文兒子、現職行政總裁盛凱(Jonathan Zeman），之後連生四個仔女，愛首飾的想法一直只能放在心中，直到去年才圓夢，決定推出自己珠寶品牌Bouchier，自己設計，請香港金飾師傅製作。「除左兩歲嗰個，𠵱家啲細路全部full day返學，我時間多咗，加上老公有個好朋友係做鑽石，所以就設計一兩件for fun俾自己戴下，朋友又叫我幫佢地設計，咁舊年就搞咗個mini trunk show，開始認真咁做。」
老爺天馬行空的創意及吸金力，成功創立了蘭桂坊王國，亦曾令海洋公園連續10年賺大錢。給新抱的生意貼士？「 佢叫我要勤力啲、勤力啲，任何事都要勤力先做得好。佢對我好好，個人好fun，好錫啲孫，成日買嘢食、買玩具氹啲孫，啲孫最開心係同佢一齊，好似日日去咗海洋公園咁。」Melinda 除了湊仔女、亦出任蘭桂坊市場創作總監、做珠寶設計，閒時會在家夾brand，老公打鼓彈結它，她和女兒唱歌。盛智文「聯合國」大家庭全視香港為家，「我自己都算係一個global citizen，但香港對我嚟講，就係我屋企。好多地方我都好鍾意，好似係山頂啦，因為我四個小朋友都響山頂出世；第二係香港仔，細個時媽咪會帶我去食魚蛋；同埋太子花墟我都好鐘意。我地無計劃移民，因為我相信香港嘅未來。」
【支持本地老師傅】
Melinda Zeman第一件首飾，來自媽咪送的周大福金鍊，而她創立珠寶品牌Bouchier，名字同樣來自一個人名，「我搵名搵咗好耐，終於搵到佢：Guillaume Bouchier ，佢係一個法國珠寶商，好耐好耐之前，由巴黎飛去中國，為宮庭入面嘅女人設計珠寶，佢帶咗歐洲工藝同風格去中國，覺得呢個故事好有意思，我地都係東西文化結合，所以就用了呢個名字」。Bouchier以簡約有趣的設計為主，如：鑲滿鑽石的chunky鍊子手鍊、單圈耳環，及充滿玩味的double rings、耳殼夾等，亦將傳統白金、黃金加入時尚粉紅色、螢光綠色。全部珠寶made in Hong Kong，由香港師傅製作，「唔敢講話帶動經濟啦，至少可以支持吓本地人嘅小生意。我好好彩，發現到香港真係有好多師傅，係好高技術，完全係國際水平，個啲工藝、手藝非常非常之靚，希望俾全世界都知道啦。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
