距離2020年的最後一日，只剩下不足60日的時間，今年對於任何人而言，一定是永世難忘的一年。
一場世紀疫症——武漢肺炎，令大家面對前所未有的考驗，有人因為經濟不景氣，令財政陷入困境；亦有人因為確診，健康出現了問題；不過亦因為限聚令的出現，大家被迫留家抗疫，在不知不覺間，令一家人的關係變得緊密；朋友因為少了見面，在僅有的時間下，偶然間聚一聚，這種久別重逢的感覺，可謂百般滋味在心頭。
90年代當紅電視花旦張可頤，在事業的高峯期因拍大陸劇《長恨歌》太投入角色而患上抑鬱症，其後一度停工休養，經歷過後，她對人生有新的領悟，學懂了如何享受生活，重新規劃自己的人生。踏入50歲的張可頤，似乎放低了當年的執着，取而代之多了一份淡然，日前接受《蘋果》專訪，對於近年的轉變，她笑說：「而家係進步咗，以前唔識得愛自己同放過自己，嗰陣啱啱入行，唔止工作，私生活都成為焦點嘅時候，成日覺得唞唔到氣，擔心啲相影得自己靚唔靚，睇到啲新聞寫得唔好又唔開心，好似冇咗自己，成日忟自己，搞到氣場會壓迫人哋，以為我發脾氣。」她續說：「以前唔知執着係點解，直到停咗一段時間，開始諗深咗，睇法唔再一樣，點解可以俾呢啲芝麻綠豆嘅嘢影響自己，放低原來舒服咁多，慶幸上天畀我着咗燈，心境平靜唔可以俾外界隨便影響，內心強大係力量，我自己都努力學習。」
現階段對於張可頤而言，放下執着，的確可以勇於嘗試：「始終我冇屋企負擔，可以做自己想做嘅事，keep好自己身體，有健康，機會嚟到，自然可以去做，呢樣係人生最快樂嘅事，好似我仲有能力做電視劇，觀眾又開心，咪做囉，唔好理收視。我係唔可以冇工作，最理想半年工作半年休息。」她更有感而發說：「2020年好似消失咗，有生之年唔忘記呢個日子，好多嘢醒悟咗，人生好無常，好多嘢係預料唔到，都未講話自己有病，如果過咗10年8年之後，有其他病痛，咁點算呀？當人生喺風平浪靜嘅時候，真係要諗多少少，當你行緊高位，唔好太過份高興，但係當你人生低谷失意嘅時候，亦都唔絕望，如果自己做到嘅，就係為自己準備，盡量去做；如果做咗，到時候都冇路行，呢啲就係天意。我最唔想係自己後悔，點解當初係唔做，咁輕率？就算自己有能力，有呢個諗法嘅時候唔做？千祈唔好畀自己後悔。」她還說：「人大咗，諗自己少咗，但求係唔使人照顧，所以我將自己能夠做嘅都準備得好。我唔想累人呀，當然遇到一個人生嘅partner，可以互相扶持，當然係好事，但係當你唔好彩嘅時候，爸爸媽媽唔係可以陪你好耐，兄弟姊妹都有自己嘅屋企，原來你係冇準備，因為你一個人嘅問題而影響到其他人，呢樣係我最唔想嘅嘢。」
有7年沒有拍劇的張可頤，談到今次與ViuTV合作，她說：「真係一個新嘗試，收劇本唔係一本故事大綱，而係一本漫畫書，未試過，我即刻好有興趣，覺得一定要試，反正我自己都未試過同ViuTV合作，亦都因為自己咁耐冇喺香港螢光幕出現，希望可以畀觀眾一個新鮮感，所以咪二話不說，即刻應承。」在《暖男》中，她與鄭中基飾演一對在生活中互相扶持的朋友，可以說是比愛情線更加深入的感情線，小姑獨處多年的張可頤，坦言自己都希望身邊有一個「阿榮」：「點解我而家保持單身，其實你會發覺好多感情係可以好深入，比愛情仲昇華。反而好普通嘅男女拍拖，覺得好脆弱，稍為唔開心，連朋友都冇得做，就算以前大家點樣好、點樣開始，點樣甜蜜，點樣溫馨幸福都好，原來一個分手都可以反面，仲差過一個朋友。所以喺劇入面同鄭中基嘅感情，對我更加deep，如果人生可以有呢啲感情，更加係無憾。」
張可頤多年來的愛情路坎坷，曾經自嘲為「單身狗」，更坦言對過愛情絕望：「有時覺得算喇，有就有，冇就冇喇，不過我今日最新嘅諗法，呢個世界係冇一個perfect match，係work返嚟，唔會叮一聲變一個perfect嘅人畀你，只係佢有一個好大嘅潛質，變成一個perfect情人，但係都需要時間去work返嚟，慢慢變心目中最理想嘅情人。」問到會否覺得人生不太圓滿，難免有點遺憾，她笑說：「你唔好唔記得，就算你有一段感情，唔代表一定好開心，喺入面有好多嘢都要修煉、學習同妥協。人嘅修煉有另一樣嘢，獨善其身好似好自私，我有我偷偷地開心，搵到錢自己使，唔使同人分。但係買到呢啲自由之餘，你都要付出代價，就係要忍受寂寞，可能喺情人節、過年、中秋、元宵，可能好孤獨。有人問究竟係扮開心定真開心，冇辦法，呢個就係你鍾意自由，呢個咪就係代價，你願唔願意付出？你問我係咪好享受寂寞？唔係享受，我唔會畀自己跌入去一個好負面嘅寂寞入面，我嗰種寂寞係獨處嘅快樂，喺屋企聽吓歌，執吓屋，係另一種嘅開心，睇吓你點樣扭轉。當然你問我係咪完全冇覺得寂寞，係有，睇吓點樣打發佢囉，我唔會唔再期待愛情，我好鍾意愛情，一定要有，就算現實冇，睇韓劇都要搵番返嚟呀！」
撰文：唐琛悠
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
