今屆香港小姐冠軍謝嘉怡（Lisa）與陳家樂今日到將軍澳出席「反斗夢幻嘉年華」聖誕裝置揭幕禮，二人分別在場玩巨型夾公仔遊戲，更夾得公仔，玩得相當開心！來自蘇格蘭的Lisa透露今年首度在港過聖誕，問到曾任護士的她往年聖誕是否也在手術室度過？她說：「聖誕多數都係放假，蘇格蘭聖誕節好唔同，早餐會食雪糕，全日睇聖誕電影，拆禮物，夜晚就同家人食飯。今年就未知點過，應該會同嫲嫲、姑媽同表妹食飯，父母都喺蘇格蘭，要出年1月中先嚟香港，而家封城，不過佢哋都可以飛過嚟，要先接受檢測，嚟到再隔離。」
已有3、4年沒有拍拖的Lisa，被問到可渴望聖誕節有拖拍？Lisa笑說：「都冇乜所謂，已單身3、4年，我要求唔係高，之前想專心讀書，因為拍拖要用好多時間。」至於問到現時是否很多人追求？她笑說：「冇呀！可能我唔夠敏感，而且我廣東話唔好。聖誕冇人約呀，等我呢幾日留意吓，下次再問我，不過我每年都係同家人一齊，因為當地聖誕等同新年。」談到當選後工作機會比上屆多？Lisa指自己首次當選，故不太清楚，一切都是公司安排。另外，Lisa是肥媽世姪女，提到肥媽老公Rick日前不幸病逝，Lisa表示有跟肥媽聯絡，而她看了肥媽拍的報平安片時也感動落淚，她指現時最重要給予空間，自己也會給她多點愛，希望對方心情快點平復，而她亦會出席Rick的喪禮。
另外，家樂成功夾到公仔，笑稱「遊戲王」的他也怕失手會被褫奪名銜，他出名愛打機，又謂本以為關智斌Kenny是他對手，不過卻爆對方愛靚多過愛玩，自己則相反。家樂表示聖誕要開工拍劇，未知能否放假，問到會約女友連詩雅一同打機過二人世界嗎？他笑說：「都可以嘅，一齊打足球遊戲。」問到連詩雅揀男友會否更叻？家樂怕羞表示不懂得回答，並拉開話題指聖誕節適合送公仔作禮物，對於送甚麼禮物給女友？他說：「人人有份，一視同仁。」問到女友要攬他，攬不到公仔，家樂笑說：「攬公仔毛鬙鬙舒服啲，攬我得棚骨唔好。」最後，提到前度女友余香凝後日結婚，家樂說：「我衷心祝福同恭喜佢，搵到一個可以行到尾嘅人。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|