2020年11月28日星期六

【振作】親自落菜園執爛尾肥媽為自己打氣：要由頭嚟過喇 #肥媽

【振作】親自落菜園執爛尾肥媽為自己打氣：要由頭嚟過喇

之前肥媽忙於照顧患病老公，之後處理亡夫身後事，直至昨日先有時間打理返個菜園。

肥媽的丈夫Rick於本月5日晚因肺癌逝世，肥媽對丈夫病逝傷心欲絕，幸而經過時間沉澱後，肥媽終於走出喪夫陰霾，昨天她在社交網上載短片，親自落菜園打理，留言：「好耐好耐都冇打理過個花園，都好幾個月了，今日一見到..唉....連啲rosemary, thyme 都謝晒。唔緊要，重頭嚟過，自己打理返，早幾日有fans畀咗啲菜苗我，有唔同的菜，多謝晒。」

片中見她置身菜園中，正彎身收割較大棵的蔬菜，邊摘菜邊呻家傭不善打理，未有早晚淋水搞到種植農作物枯死，似乎有返啲心機打理吓嘢，肥媽有感而發說：「呢啲生到咁大棵都唔摘，摘嚟滾湯先，fans畀我嗰啲菜苗我都種咗，呢幾日忙搞老公三七啲嘢唔得閒理，傭人夜晚唔淋水，搞到乾鬼晒激死我，今朝一早搞返，已經燒晒啲嘢(畀老公)，唔求人開始自己打理返，種返啲嘢先，唔到你唔信(邪)，我老公病嘅時間，佢食嘅香料就算好大棵都死晒！要由頭嚟過喇，振作！」她還透露兩子經已搬返跟她同住，所以日日好忙要煮飯。

而本周日晚九時，係肥媽喪夫後復工做直播，她已出post約定fans到時教煮蒜蓉牛油焗龍蝦尾車厘茄。似乎生活已回復正常軌道。