早前患上耳石移位的83歲資深演員余慕蓮（余毛），今年8月咳嗽不適入院留醫，醫生診斷她是肺纖維化，並非武漢肺炎，最終留院8日才回家，余慕蓮這段期間都足不出戶，在家靜心休養。不過昨日又傳出她因肺纖維化在伊利沙伯醫院的ICU留醫，《蘋果》記者致電余慕蓮手機，有女護士代接電話指她要插喉。
余慕蓮好友、時裝設計師鄧達智今日短訊回覆《蘋果》時說：「佢而家喺ICU插喉，冇人可以同佢通電話，我當然擔心，任何人都唔可以探望，電話都打唔到。」鄧達智表示大約周前有到過旺角探望余慕蓮，但不太清楚她的病因並說：「佢諗住自己一路行得走得冇事，上年我哋有個醫生好朋友提議搵工人幫佢，同埋又叫佢去驗身，但佢唔鍾意，話自己行得走得，使乜人幫？嗰個醫生係老人科，睇到佢有啲徵狀唔正常至叫佢去驗，但佢冇去驗。到今年隔咗成年，知道有問題，醫生之前提醒佢嘅嘢應驗咗，只係佢嫌麻煩，仲鬧鬼人。」
余慕蓮契仔黃澤鋒今日在電話訪問時說：「我今朝睇新聞先知契媽個情況，我而家都唔知佢情況點，我兩星期前同佢通過電話，佢話冇乜嘢，唔知噚日究竟發生咗乜嘢事，知道佢工人近日嚟咗。疫情下所有醫院都唔探得 ，兩周前通電時佢話想見我個囡囡，我話疫情定少少帶囡囡畀佢見，其實佢之前冇工人，我係有啲擔心佢。」資深傳媒人汪曼玲今日在社交網為她集氣，她留言：「余毛正在ICU，大家齊齊集氣，祈求菩薩保祐，打勝呢場仗，健健康康出院。今年83歲的她，一向很有生命力。余毛加油！加油！加油！」
余慕蓮近年身體壯況大不如前，不過因為她圈中人緣好，友人不時會出手照顧她，8月出院回家，她自知肺纖維化導致呼汲不太暢順，她理解「年紀大，機器壞」，獨居的余慕蓮新聘的外傭未到，所以朋友會隔天到她家為其買餸煮飯。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|