【躺著也中槍】參加《造星III》惹網民狙擊 Odilia唔敢睇負評驚影響情緒
ViuTV選秀真人騷《全民造星III》於本月初首播，今季以「藝人再出道」為主題，當中有不少熟悉的面孔，包括前E-kids成員林詠倫（Alan）、前As One成員陳葦璇（前名陳嘉茵）、顧定軒等，旋即引來不少迴響。在首輪面試中，節目監製花姐（黃慧君）已多次問參賽者，可承受得到觀眾的批評？可擔心節目出街後，反令支持者流失？至今《造星III》已播出14集，首次分組淘汰賽正式展開，昨晚一集由A5組鬥B2組，首位被Foul出局的是彭秀慧所訓練的B2組成員Vincent。對此賽果，不少網民都戥Vincent唔抵，而同隊的Bingo成員陳康琪（Odilia）更是「躺著也中槍」，有人留言：「咩世界咁都入到圍」、「應該Out CY同Odi，留番Vincent」、「寧願要Odi走」等。
然而在連登討論區，已有網民以「每日OdiX老X問候區」為題開Po狙擊Odilia，更有人設立「反Odi大聯盟」，力數她自以為是、難相處、跳唱唔掂。一向大膽敢言的Odilia早前接受《頭條日報》訪問時，也坦言曾質疑自己是否仍適合做跳唱歌手，入到《造星III》，面對一眾有實力的參賽者，她表示又驚又大壓力，「其實係公司叫我哋去參加，起初我都話有機會畀人哋踩到落底㗎喎，入到去發現，其實前面諗幾多做唔到嘅諗法都係多餘，做咗先啦，做到一個位睇番轉頭，可能反而得到更多。（有畀人鬧到想放棄？）冇，畀人鬧親就愈想做得好，愈戰愈強，我會觀察評判讚嘅人，即使係一個未出道嘅人都有佢嘅好處，我就學習、吸佢嘅好處，在Modify喺自己身上，做藝術嘅人就要不斷改善，要學識去深化個內容，令到件事變得有內涵，而唔係為做表演而做畀人睇。」
不過對於近日一地負評，Odilia今日透過電話回覆本報稱唔開心咗幾日，「首先都擔心屋企人見到呢啲負評會唔會唔開心，節目出街後，媽咪都有問我：『阿女點解咁多人插你、抨擊嘅？』嗰刻都會有啲難面對，我都有搵朋友、經理人、同事傾訴；至於其他留言我都冇睇太多，因為免得影響自己情緒。」問到被指性格差、難相處？她否認稱：「識我嘅朋友都知我係好玩得、好講得笑，同埋性格比較直率啲，譬如見到有問題存在，我唔知點樣去轉彎抹角講出嚟，但由始至終我都係對事，並唔係大家所講嗰種難相處，希望大家會留意到我往後幾集嘅表演，我想證明畀大家睇，參加呢個節目我係有決心做到一種改變、大躍進，我都好想有個轉捩點變得更好。（後悔參賽？）冇，我好Enjoy每個Moment，呢段時間自己成長咗唔少，希望大家未來見到更加成熟嘅我。」
|
鍾意就快D Share啦！
|
|
|
