你知道許家傑是誰嗎？
⋯⋯
「送水輝」呢？
對！就是《愛．回家》那位。知道了吧？
三十七歲的他，十一年前以「香港先生冠軍」的身份入行，到一七年才憑「送水輝」，首嘗事業的甜味，但他卻有另一番演繹。
「做人，同財富一樣，都係要累積嘅，就算我因為『送水輝』，叫做爆紅，但好多人識我，未必係因為呢個角色，佢哋知道有個茄喱啡喺度，只不過佢哋噏唔出我個名啫。」
說時並不意氣風發，只是一副看透世事的坦然，只因一路走來，許家傑演過至少三十二個沒名字的茄喱啡角色，才有「送水輝」的出現。
「雖然我唔叻，但我好俾心機嘅，所以學識咗好多嘢，於是可以喺『送水輝』身上，運用番出嚟。我知我離成功仲好遠，但我enjoy做戲，像做演員嘅最大回報，俾我一路都有得做，就已經係最開心！」
留名只是首步，在充滿未知數的娛樂圈，許家傑仍相信循序漸進，一步一步走，才能長做長有。
Artist變演員
遇上「送水輝」前，先來回帶Mode，〇九年許家傑參加「港男」前，從事核數行業已有四、五年，月薪可達三萬元，對當時廿五歲的他來說，已屬高薪厚職系列。
「廿五歲好似一個關口咁，我覺得要為自己做啲嘢，做核數好穩定，仲已經foresee到我之後條路會係點行，但係我個人坐唔定，於是就想有啲變化。我有諗過去working holiday，流浪吓，但一走就起碼兩年，即係要我離開屋企人兩年，我覺得太耐；參加港男，最多咪兩個月，參加完我又可以有個回憶，點知又咁好彩俾我贏咗，跟住就順理成章咁入咗TVB。」
由刻板的核數員生活，跳進五光十色的娛樂圈，許家傑也有過一段迷惘期。「啱啱贏咗嗰一年，係我嘅蜜月期，話晒係『香港先生冠軍』，到第二、三年，我已經唔係新人，冇咗冠軍光環，只係TVB入面一個藝員，又唔夠人哋靚仔，做戲又唔夠人哋好⋯⋯TVB人才太多，令我覺得自己只係微塵。」
不是科班出身，演技自然成為其弱點，但大公司勝在機會多，他成為《東張西望》一員，竟令他的自卑感更強烈。「嗰時入咗行已經幾年，好多時我做《東張》，錄番啲VO，有工作人員話：『點解你講嘢咁多懶音o架？』，更加令我覺得，自己乜都唔識，甚至會懷疑，自己係咪唔啱做呢行？
「於是我調整自己，有懶音就去學咬字，做咗《東張》年幾，我發現自己都係鍾意拍劇，因為有多啲機會去試唔同嘅嘢，好似嚟緊拍《拳王》，我就可以去學打拳；拍《飛虎》嗰陣，又可以去上training，學隊形同走位。」
兜轉之下，許家傑還是走回演員路，「以前填職業，我通常都係寫『Artist』（藝人），近呢幾年，連報稅我都係寫『演員』，因為就算搵唔到錢，我都想以演員作為我嘅終身職業囉。」
三年下來，他已視《愛．回家》的另一半「大小姐」林淑敏為親人。
為了令廿五歲的自己留下畢生難忘的回憶，許家傑就參加《香港先生選舉》，成為冠軍，不只留下回憶，更從此改變其人生軌跡。
小時候的他，曾因口齒不清而上言語治療班，「每次上堂，就揸住本故事書喺度讀讀讀，上咗兩、三個暑假先唔使再上。」
|
鍾意就快D Share啦！
|
|
|