54歲影后級劉嘉玲絕對係圈中氣場強嘅女星，一出場已有壓場感，3年前劉嘉玲挑戰演大陸劇《情深緣起》外強內弱、時勢所迫嘅風塵女子「曼璐」。由於劉嘉玲整個人散發出強勁氣場、眼神凌厲，大陸觀眾都有感劉嘉玲舉手投足與「曼璐」性格有點格格不入，完全唔似家道中落被迫賣唱嘅舞女，反而似足特務潛伏在舞廳，又似霸氣黑社會大家姐。
劉嘉玲一向專攻電影圈，偶爾上大陸綜藝節目，至於拍劇方面，佢自從2005年擔正做大陸劇《一江春水向東流》演「交際花」王麗珍之外，已相隔12年冇再拍一啲重戲份嘅大陸劇，直至2017年接拍《情深緣起》，同劇演員有蔣欣及鄭元暢等，等咗3年，該劇今年才首播，不少網民對於劉嘉玲再次出山拍劇評價好壞參半。
當中網民鬧得最勁就係該劇選角有嚴重問題，根本係「中年半生緣」。劇中「曼楨」蔣欣與「曼璐」劉嘉玲演姊妹，但佢哋拍埋一齊時造型完全唔夾，望埋去似兩母女多啲，蔣欣年齡跟外形亦與主角曼楨柔弱嘅性格唔同，有網民認為「蔣欣表情總是很苦情，但沒有溫柔的感覺」，更經常晒八字眉苦情樣，挑戰「囧式」演技，加上蔣欣外形骨架大、手臂粗，唔似要人保護，感覺打起上嚟可以輕易KO大男人，而61歲大陸藝人吳冕卻演劉嘉玲母親，佢哋實際年齡僅差7歲。
最無厘頭係要54歲劉嘉玲紮孖辮扮少女競選花魁，少女look上台獻唱，後來劉嘉玲打扮亦冇舞女feel，更似高貴豪氣嘅媽媽桑，有網民形容佢似芝麻街嘅「Miss Piggy」豬小姐。
近日播出劉嘉玲在街上救險些被車撞嘅妹妹曼楨，曼璐不幸流產，事後曼楨不捨得家姐曼璐傷心，呃佢話BB仲喺度。之不過大陸網民指女人流產後，一般身體比較弱，但係劉嘉玲卻一時卧床痛苦呻吟，一時又雙手向上抓一邊發開口夢，之後又好精神咁坐起身大聲講嘢，完全冇虛弱嘅感覺，另有網民批評攝影師用低抄鏡頭，令劉嘉玲鼻孔睇落好大有點搶Fo；更有網民稱劉嘉玲拍劇演技不太適合，反而劉嘉玲拍電影啱角色感覺OK。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|
