創作歌手Kellyjackie（陳曉琪/KJ）15年前在網上發佈一曲《他約我去迪士尼》迅速爆紅，最近再次成為網民熱話，但談論的不是她的音樂，而是她的暴脹身形，不留情面叫她做「Kellyfatty」，又指是「童年崩壞系列」，盡是傷人說話。
Kellyjackie的體重巔峯期超過200磅，日前接受《蘋果》專訪時已回落不少，她笑着說：「終於有返少少輪廓，哈。我諗年初做《警訊》主持係最癲，睇留言幾得意，話我肥過部坦克車，朋友怕我會hard feeling。但入行咁耐，明白網絡世界係咁，多謝佢哋花時間留言，用另類方式提醒我。」KJ透露情緒多年來起起跌跌，試過幾日幾夜不進食，又試過暴飲暴食「唔知飽」，問其原因，她也說不出一個答案，但或許與太早成名有關。
當年只有16歲的KJ，會考期間創作《他》，隨着網上人氣很快便獲唱片公司賞識，簽約成為正式歌手，但其後與舊公司發生合約糾紛，令歌唱事業停滯不前，遇上人生第一個低潮。「以前每個歌手差唔多三星期就出一隻新歌，但我連續兩、三年都係唱《他》，你會見到台下其他歌手粉絲嘅口型『仲係呢首歌呀？』⋯⋯我嗰刻仍然要keep住帶歡樂畀大家，可能食埋食埋（委屈），入咗身體都唔知。」
KJ不自覺患上抑鬱症，會用好多方法「懲罰」自己，例如不准接觸最愛的音樂，又會拉起窗簾將自己困於不見天的房間。為尋找一個可以盡情痛哭的空間，KJ選擇去戲院睇早場，「好錯㗎個生活，3、4日唔食、唔瞓，搵啲自己好驚嘅恐怖片嚟睇，成件事好自虐。」直到一天，她見到91歲的婆婆偷泣，令她醒覺不可以再讓家人擔心，「我係單親家庭長大，同婆婆媽咪一齊生活，嗰段時間我係變咗第二個人，對住屋企人好暴躁，上網睇抑鬱症病徵，發現除咗輕生一項，其他都中晒。」
抗拒求醫，多年來尋不同的自然療法，例如音差、香薰精油、水晶、身心靈治療等等，KJ亦幸運地遇上前輩米雪，介紹律師幫忙解決合約問題，讓她漸漸走出絕境，還繼續讀夜校進修，終獲取工商管理學士學位。但2017年突如其來的疾病，又再一次打沉了KJ。她做了一個胃部手術，體重開始失控，她說：「一直以為自己好返，但原來仲有好多情緒未處理好，我學好多嘢，雙截棍、跟黃秋生學戲、跟彭秀慧老師學舞台劇，好想裝備自己，令支持我嘅人唔好失望，但原來只係裝作堅強，將一啲嘢冚到好埋。係後來朋友話我知，原來我一有壓力就不停擺嘢入口，叫到成枱炸雞pizza，一路諗嘢一路食，自己唔覺得飽，完全唔係enjoy食物，唔係enjoy做緊嘅嘢，甚至唔係enjoy緊生命。」
今年7月，KJ參加了戲劇老師甄詠蓓舉辦的「迷失的小孩」（Lost Child）藝術展，並以《來一場用耳朵「寫」的音樂記事本》為作品命題，「寫」有斷捨離的「捨」意思，盼在迷失時尋回自己。「每個人隨住年齡增長、工作壓力，可能將某些事放埋一邊，我將以前抑鬱症嘅療程當日記咁寫低，希望透過呢個project將自己同『內在小孩』和好返，釋放抑壓嘅情緒。」即使經歷好多，但她從來沒有放棄音樂，繼續有教人唱歌，在網上開Live，她說：「我唔開心嘅時候都係聽別人嘅歌，令自己情緒好返，既然上天畀咗呢把聲音我，亦希望發揮呢方面嘅才能，亦係我成日講嘅用生命影響生命。」
採訪：嵐山
攝影：陳俊強
場地提供：Mrs Happy Club
髮型： Kenny Chan @ Hair
服裝: Noveltylane
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|