【Timo Manson被Foul】《造星III》十強名單漏出 花姐唔否認只強調冇造馬
搞到TVB要變陣的ViuTV皇牌節目《全民造星III》前晚(7日)由40強去到30強，前四局分組表演中，A組和B組2比2平手，需透過「終極生死戰」定輸贏，結局大家都睇到，A組在生死戰以1:4落敗，導師林二汶要忍痛大Foul六名成員，網民瘋狂鬧爆評判梁文禮及C AllStar成員釗峰等，指結果造馬，揚言《全民造星III》以後要叫《全民造馬》。鬧爆聲中更有熟知《造星III》內情的網民懶理劇透被咒罵全家而在連登大爆十強名單，《頭條日報》記者即拎名單向節目話事人花姐查問，回應係:「真定假，唔會講啦。」咦，冇否認喎。 撰文:金泰亨
因為疫情影響，今季《全民造星III》較以往兩季更多人睇，自節目播出後討論度超高，連圈中人如張敬軒、張繼聰、陳柏宇及鄭伊健等都有追睇。30強於前晚終於誕生，二汶揸旗的A組輸比賽但贏民心，大量網民在ViuTV社交平台派嬲及留言狂鬧表達不滿，「還我A組」、「有無搞X錯」，不少人仲話要罷睇，群情相當洶湧。
再見Timo Manson
十強其實於11月尾已有結果，ViuTV將於12月最後兩星期公佈，總決賽已定12月26日舉行，會否安排觀眾入場要睇疫情才決定。既然十強已選自然有人知，有唔生性網民就衝出嚟爆，在連登公開十強名單，分別係NY、ANSONBEAN、葉巧琳、CY、Alina、Kimman、KLau、Ben、陳葦璇及Cloud。咦，Timo呢?Manson呢?CY?????????唔好啦。
記者即拎名單Wtsapp花姐，問佢究竟堅定流?畀人鬧咗一晚「造馬」嘅花姐並無否認，「我有聽聞，不過真定假，為咗觀眾，唔會講啦，只知我同兩個導師，強尼都會留到決賽。」再問會否捉內鬼?花姐就話，「如果有，你可以叫內鬼話俾觀眾知，全民造星從來都冇造馬。」好一招四両撥千斤，一嘢就回覆埋一眾不滿A組輸咗嘅網友，而回應中花姐Post咗兩個笑到喊嘅Emoji，應該笑嘅，全民中晒造星毒，仲搞到對家要變陣，瞓着都笑醒啦，係咪呀花姐?
|
鍾意就快D Share啦！
|
|
|