今時今日香港已變得不一樣，尤其今年7月「港版國安法」實施後，更引爆港人移民潮。昔日在無綫經常演師奶和北姑的黃鳳琼，原來早對香港政府心死，6年前已離港移民加拿大多倫多，難怪過去幾年在娛樂圈銷聲匿迹。
黃鳳琼日前接受《蘋果》電話專訪時滿欷歔的說：「我好慶幸當年離開咗，如果唔係，我可能已經『被自殺』，或已經唔知去咗邊。」
現年53歲的黃鳳琼，是演藝學院畢業生，跟李婉華、劉雅麗是同班同學，1988年參加無綫《銀河接力大賽》入行，觀眾較深刻作品，可能是《大時代》丁蟹的走佬老婆，又或者是周星馳電影《九品芝麻官》中跟表哥常威（鄒兆龍飾）有姦情的婉君表妹。
黃鳳琼在無綫20多年來拍過數以百計部劇集，包括《歲月風雲》、《巾幗梟雄》、《鐵膽梁寬》、《怒火街頭》等等，但被派演的角色，不是師奶便是北姑這類閒角，黃鳳琼坦言感到氣餒。
對扮演北姑抗拒？黃鳳琼想了一會說：「都唔抗拒嘅，但係就……一份工囉，最尷尬係當年我已經係一個師奶，我要做一個北姑，要同陳敏之爭仔（《怒火街頭》），呢啲小角色只係PA通知你，你會覺得：『我點做呢？我唔知喎？我憑乜嘢同陳敏之爭呢？』我當時咁諗，惟有將自己醜化，再北姑啲，我記得開頭監製睇咗（部份已拍攝片段）仲話『唔係咁㗎！』我返去化妝特登化到好紅嘅胭脂，我點可以同陳敏之爭呢？佢又靚女又後生，我惟有將自己角色設計到一個好平嘅北姑。」
工作20多年也未獲公司重用，黃鳳琼自然想過放棄：「其實放棄㗎啦，人哋專心拍嘢，我咪專心湊仔囉。當時只係當打一份工，因為唔想淨係做一個全職主婦，因為有啲朋友話做全職主婦會同社會脫節，所以咪當一份工囉。」
2012年尾，王維基成立香港電視網絡（HKTV）準備進軍免費電視行業，並招兵買馬力邀黃鳳琼加盟，對演藝工作早已心死的她忽然見到曙光，重燃希望，可惜2013年10月政府以「一籃子」因素拒絕港視發牌申請，黄鳳琼的演藝夢亦徹徹底底粉碎。
可會是港視不獲發牌致心死移民？黃鳳琼直認不諱：「係㗎。主要覺得冇咗公義呢樣嘢，不過而家呢個世界冇㗎啦。」說罷她也忍不住冷笑幾聲，直言：「我係對香港政府失望。我有細路仔（3子女），最主要係細路仔應該睇吓出邊個世界，所謂移民，你都可以讀完書返香港生活。但香港當時政府已經係咁樣，係咪更加應該出去睇吓呢？」黃鳳琼坦言，港視的出現曾帶給她希望和曙光：「當時我小朋友正正脫離照顧嗰段時間，我覺得港視幾有誠意，幾有希望，希望過港視之後畀心機做嘢。」
2013年10月16日，政府判港視死刑後翌日，港視宣佈裁減320名員工，當日同事相擁道別情景，黃鳳琼仍歷歷在目：「你係未見過一間公司將啲員工炒魷魚，啲員工係會咁團結，咁開心去同大家道別，所謂開心係嗰種難捨嘅精神，所以港視嗰個衝擊係好大，我自己個人覺得，香港到咗一個指鹿為馬地步。」指鹿為馬情況，今時今日香港更為明顯。
近年無綫要藝人轉簽一年六騷或一年一騷合約，迫使劉江、雪妮等一班資深演員相繼離開，問她又有何睇法？黃鳳琼笑說：「佢哋貴吖嘛！同埋公司今年蝕好多，我當年冇呢個問題，我人工好唔啱呢個市場價格，我可能平過做保安㗎，喺我未簽港視之前，我後期態度只係覺得返一份工，唔使嘥好多時間，又可以湊細路仔。」
移民加國後不久，黃鳳琼回復單身，現時全心全意照顧子女，偶爾會以玩票性質客串當地舞台劇演出。可有興趣返港拍劇？黃鳳琼表示要視乎拍攝時間長短：「如果返香港住一、兩年，我唔會囉，幾個月嗰啲或者會考慮，但我真係太喜愛香港啦，我驚我返嚟會死咗，香港而家咁開心……（講緊反話？）係呀！不過而家好好彩，好多香港人都有一個機會可以離開，我好慶幸當年離開咗，如果唔係，我可能已經『被自殺』，或者已經唔知去咗邊。我當年喺香港湊仔，都會留意社會事件，但我冇話出嚟參與遊行，之前係冇嘅，而我真係開始參與遊行示威，係港視發唔到牌，比較深層啲認識到香港嗰啲政治人物啲態度。最主要當時自己冇乜所謂，小朋友要繼續長大，不如睇吓出邊世界啦，就係咁。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|