2021年1月9日星期六

【頭條獨家】提名視后逾十次攞獎隨緣黃智雯有男友鼓勵踢走負能量 #視后 #黃智雯

提名視后逾十次攞獎隨緣黃智雯有男友鼓勵踢走負能量

黃智雯有男友鼓勵，踢走負能，能否榮升視后都係咁開心。

TVB嘅台慶頒獎禮將於周日(10/1)舉行，黃智雯（Mandy）憑《使徒行者3》中患有亞氏保加症及學者症候群嘅Madam G角逐「最佳女主角」，與龔嘉欣及蔡思貝爭奪首個視后獎座，雖然有信心，但Mandy坦言心態上要作出調整，好彩相戀8年嘅男友詹文天（Anthony）早已成為她心靈治療師，令她入行13年都保持到良好心理質素。採訪：方騫平化妝：Zoe Fan 髮型：Jay Cheung 場地：Hair Festival Walk

黃智雯在《使徒行者3》中的角色相當考演技，尤其知道家姐（康華飾）一直協助大奸人馬國明時，她變得唔出聲嚟封閉自己，網民大讚她演技拿捏得好好。

坦言需要關懷

兩年前黃智雯於《三個女人一個「因」》中演人格分裂嘅「方以因」被選為「民間視后」，可惜TVB「最佳女主角」獎就擦身而過，輸咗畀《BB來了》的李佳芯。入行以嚟提名視后逾十次，今次係咪好大機會「跑出」？Mandy即說：「隨緣，今年幾套作品《使徒3》、《十八年後的終極告白》、《降魔的2.0》角色都好唔同，反正演員功課交咗，已經唔使諗後面嘅事，經歷過同獎項(視后)好近，真係要喺心態上作出適當嘅調整，學插花及陶瓷都幫到手。」而男友亦幫咗佢唔少，「佢會用另類方法安慰我，見我諗唔通唔開心就會鼓勵我，我係好需要關懷，而佢諗嘢比較理性，作為藝人係要長跑，心理質素好重要，多年嚟佢幫到我管理情緒，重整負面心情，其實一個人面對失敗真係唔容易，但人永遠唔會停留喺高峯，跌過先知道喺高峯時嘅快樂，跌到谷底先有力量彈返起身。」