蔡一傑一生屬於舞台，在樂壇縱橫36年，2019年原本是他的大日子，原定前年10月舉行首個個人演唱會《REMUS CHOY ONEDERFUL LIVE SHOW 2019》，不過因社會運動關係，個唱取消，令蔡一傑一度消沉。之後疫情肆虐全球下，傑仔的歌唱事業前所未有地停頓了逾一年，不過卻因禍得福，傑仔成功開拓了自己的煮食教學channel「傑少煮意」，吸納近10萬followers，是否覺得當YouTuber也搵到錢？傑仔平反說：「錯嘞，而家買餸真係幾貴，買豬肉、龍蝦都好貴，一條片都冇幾千蚊畀到我，真係蝕住做㗎，不過唔緊要嘅，做呢件事主要係同大家分享煮食嘅樂趣。」
自小已愛烹飪，原先只打算在疫情間與大家分享煮食心得，誤打誤撞下竟發現有很多人留意，不經不覺頻道已一周年：「2019年嘅10月有個個人演唱會，臨做前4日要取消，對我嚟講都幾可惜嘅，因為籌備咗3年時間，做唱片、又做好多訓練，最後做唔到，個人真係好唔開心，去到12月個人都未恢復狀態，當時要做節，通常屋企人都返晒嚟我屋企食飯，年年我煮飯，嗰日就上網睇吓有冇靈感，越睇越多，發現可以用唔同形式分享，我就覺得蔡一傑都可以分享煮嘢心得，當時拍片掟出嚟畀人睇，又有反應喎，《傑少煮意》就係咁誕生。但我可以講，煮嘢食同製作真係一啲都唔容易，我要求比較高，拍拍吓都開始有壓力，尤其係諗煮咩餸菜，真係好難搞㗎。」
傑仔續說：「煮嘢我絕對唔夠啲大廚嚟，我唔係廚師，但我平時煮開嘢知道啲技巧，同人分享家庭餸菜比較多，喺大家面前呈現一個咁嘅男人——平時喺舞台咁跳脫，落咗台又可以去街市買餸，同阿姐講吓飲食經，多方面唔同，幾好玩。」
傑仔諗頭多多，他笑言已經想好了多個《傑少煮意》的後續計劃，他說：「本身上年年頭開始有一個理想，就係開一個『傑少出巡』，帶大家去世界各地唔同地方介紹食，第一我好鍾意旅遊，第二我又好鍾意食，我可以去玩，又可以拍到嘢同大家分享，網民可以自薦，我哋可以dating，當然唔係相睇，而係去屋企見佢祖母，學一個地道食物，希望疫症過咗就拍。」傑仔也希望為香港小店出一分力，他說：「如果疫情仲持續冇得飛，我都想幫吓香港嘅小店，幫佢哋推介好味嘅食物，等佢哋生存空間大啲，佢哋都好慘。」
新一年，傑仔揚言會繼續他的個唱夢，不輕言放棄：「唱歌工作未試過停咁耐，但我個人就冇停到，繼續做唱片同作新歌，同埋個人演唱會我係冇放棄嘅，希望今年年尾攞到個期。我已經諗咗，演唱會絕對唔會同草蜢一樣，而家多咗個《傑少煮意》，到時場內會唔會有好香嘅氣味呢？或者入場時上電梯前有好多美食、靚酒，好似去時裝騷咁，希望會好玩。」
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|