2021年2月23日星期二

22歲二仔去年11月結婚　羅霖唔急抱孫恨見100分混血新抱 #羅霖

22歲二仔去年11月結婚　羅霖唔急抱孫恨見100分混血新抱

羅霖去年11月榮升奶奶，最想盡快跟身在美國的二仔Jordan及新抱Dhyana見面。

羅霖今日到觀塘出席新春團拜活動，新一年她祝福大家身體健康，疫情過後能正常工作與生活。談到22歲的二仔劉子熙（Jordan）去年11月與德日混血兒Dhyana結婚，榮升奶奶的羅霖直言好掛住身在美國的兒子及新抱，她表示沒有婆媳問題之餘，更好似多了一個女兒：「我們會講個多小時電話，好多嘢兒子冇同我講，Dhyana都會話我知。新抱識煮飯同做家務，又會鞭策囝囝讀書，我放心晒！」不過羅霖卻稱不恨抱孫，事關Jordan於4月才踏入23歲，「周圍見識吓先都未遲，同埋佢哋計劃4、5年後再生B，新婚享受吓二人世界先」

羅霖唔恨抱孫，不過就恨與新抱正式見面。新年時二人以視像拜年，Dhyana更以廣東話講祝賀語，獲羅霖大讚有語言天份。她亦非常關心二人對補擺喜酒及度蜜月的安排，又再次大讚兒媳：「Dhyana好尊重我意見，真係100分，不過大家尚未真正見面，唔知到時會否加、減分呢，哈哈。」二仔已拉埋天窗，但羅霖不會催促24歲大仔劉子榕（Nathan）及15歲細仔劉子晉（Jonathan），她坦言自己已見過細仔女朋友，同樣是靚女混血兒。