裕美：留番條命分一半錢畀我
裕美對於男友林作與鍾培生鬧出擂台隻揪事件，她笑說：「我話你冇肌肉點打，佢話打算博一博，搵人教佢打喎，依家嚟學有鬼用。（鍾培生話幫香港人出氣打鑊佢！）阿作係抵打，我又何嘗唔係日日都想打佢。（仲話輸贏都畀100萬佢？你鼓勵佢上擂台？）佢直頭自己衝上台啦，打到流血爆缸都唔緊要，留番條命分一半錢畀我。」問到可會叫林作收斂？她說：「佢收斂唔到，要用膠紙封住佢把嘴，佢都成日寸我。（擔心佢玩出火？）都擔心佢出街畀人打，但啲人喺街又唔會鬧佢，我都唔鍾意佢把口，但鍾意佢心地好。」
鍾培生曾與陳婉衡及蔣家旻傳緋聞，陳婉衡受訪時坦言希望兩男擂台見，她笑說：「呢件事幾有娛樂性，作為觀眾都想呢場賽事打得成，打得成都幾想睇。（睇好邊個打贏？）其實一個我唔識（指林作），一個我就唔熟（指鍾培生），但係見鍾生屋企有擂台，又打過慈善賽，如果打得成相信鍾生會打贏。（同鍾生唔熟？）真係唔熟o架！第一次見面就係佢邀請我上佢節目拍片，唔知點解之後就傳咗緋聞喇，哈哈。」
來源 source: http://orientaldaily.on.cc
|
鍾意就快D Share啦！
|
|
|