李家鼎細仔李泳豪於2011年被楊思琦狠心背叛，翌年雖然曾經同洪天明舊愛、中韓混血兒Miki有過一段情，不過只係曇花一現，之後一直單身。據知，李泳豪終守得雲開，走出楊思琦陰霾，幾個月前撻着新歡Agnes。Agnes同佢之前嘅女友完全唔同，賢良淑德，一早識行奶奶政策，氹得「未來奶奶」施明鬼咁開心，仲不時喺自己社交網為「未來老爺」李家鼎宣傳，認真識做。
據知李泳豪同Agnes同樣都係愛犬之人，唔介意拍拖同施明、李泳豪姪仔（阿哥李泳漢4歲囝囝Alfie）4人行，李家上下都對Agnes讚不絕口，李家鼎同施明更希望已40歲嘅李泳豪快啲成家立室，刷定牙飲新抱茶。
至於楊思琦於2011年搭上吳帥，隔一年就生埋女，不過佢同吳帥終分手收場。直到去年佢再誕下一子，但佢蛇咬都唔肯透露邊個係兒子經手人。
東網致電李家鼎，佢話已見過Agnes，大讚對方係好女仔，仲好尊重老人家，問係咪已認定對方係新抱仔？佢話：「唔一定，佢哋只剛開始個幾月，不過我有同佢食過飯，佢為人真係好細心！」係咪想個仔快啲成家立室？李家鼎話：「唔好話咩年紀，我係老人家，都想啲仔快啲結婚，唔好兩頭遊，不過個女仔真係幾好！」
來源 source: http://hk.on.cc
|
鍾意就快D Share啦！
|
|
|