好可惜！
為紀念藝人吳孟達離世，無綫播出特備節目懷緬，和他相識多年的好友如田啟文、林子聰、鄧英敏、戴志偉、關禮傑及王晶等做嘉賓。田啟文遺憾之前吳孟達在醫院仍清醒時未有探望對方，到見面時對方已沒有反應，一直緊閉雙眼未有反應，直到臨走一刻突然瞪大雙眼，似是想給眾人反應，跟着便離開了。
講到吳孟達的身後事，他表示其家人比較傷心，先讓他們好好休息：「佢哋首先要搞咗死亡證先，好多人都話幫手搞，我叫佢哋畀少少時間我消化同佢家人商量先，因為要考慮場地同安全，而且只辦一次，加上佢又有咁多海外朋友同粉絲。其實佢家人本來唔想搞追思會，我話我哋個行業一定要搞，後來徵得佢家人同意，交畀我負責搞。」問到吳媽媽的情況，他透露吳媽媽已90多歲高齡，直至昨日才得知吳孟達的情況：「佢嚟到之後好傷心，所以好早送咗佢離開，唔想再刺激到佢，希望唔好有咁多負面報道，尤其係假新聞。」他表示吳孟達於2014年大病後已立好遺囑，並澄清對方沒有經濟問題：「話佢有1千萬遺產當然係假，但我唔會講有幾多，仔女亦冇為遺產而去搞乜。」
至於林子聰透露未能見到吳孟達最後一面，他今次匆匆回港，下周就要到內地工作，可能未必出席到對方的追思會。
曾因欠債尋死 吳孟達頓悟重新做人
曾志偉在台上分享吳孟達的新故事：「佢年輕時生活放任，又飲酒又賭錢，欠落一身債，周圍問人借錢，啲人都唔敢叫佢開工，但有個朋友仲不停幫佢，後來連呢個朋友都唔幫，佢覺得冇希望人生去到盡頭，於是喺城門水塘一腳踩入去，佢望住個天話想下世重新做人、做個好演員，但又諗到下世未必做人，依家仲係人，不如依家重新做人，後來返屋企瞓咗一日一夜，佢返到無綫同編劇監製講，你會見到不一樣嘅吳孟達，從此佢唔帶劇本入廠，因為已經記熟晒對白，仲記埋對方對白。佢由一個係人見到都驚，到變成都大家敬佩嘅演員。佢為人同演技真係令大家佩服。」說時他不禁哽咽。
吳麗珠慶幸有吳孟達做師兄
有份出席的藝人吳麗珠是吳孟達在訓練班的師妹，兩人在《歡樂今宵》時開始合作，她表示：「最深刻係佢經常喺木人巷同夏雨，譚炳文、余子明猜枚，佢教我猜枚，佢話猜枚唔可以咁斯文，要有氣勢，我好佩服佢，猜枚還猜枚，但入廠唔會甩轆。之前啲人話會蝦新人，但我好好彩，冇畀人蝦，佢仲教我好多嘢，佢會主動同我對劇本。」
齊睇三級片建立關係
杜德偉透露2004年跟吳孟達在內地合作電影，他笑言當時覺得能跟對方合作好威水，問到難忘事，他說：「我記得有日佢問我，你有冇帶三級片嚟，佢話要建立好關係，就係兩個麻甩佬一齊睇三級片，我隨口答佢有，佢話咁一陣入你房睇，後來佢入我房，佢送咗本書《角色的誕生》畀我，佢話合作關係近嘅演員都會送呢本書畀對方。佢話自己早期就好霸氣，喺片場殺到其他人一頸血，睇完本書諗咗好耐，覺得應該係做王者而唔係霸者，霸者以力服人，王者以德服人。」另外，他指吳孟達很欣賞其母親，有次得知杜媽媽來探班，特意一齊食飯：「佢仲向媽咪唱咗首《給我一個吻》氹得媽咪好開心。」
王晶大讚：最好的下把位演員
至於導演王晶稱跟吳孟達早在《歡樂今宵》時合作，90年代又合作過十多部電影，他形容對方：「好友善又任性。」大讚他是最好的下把位演員：「任何演員遇着佢，角色都會加分，佢係100%下把位演員托到你最好睇，但自己又好睇。」苑瓊丹稱吳孟達面對導演不合理要求也不會動氣，會尊重對方意見，又會用嬉笑怒罵態度化解。
羅冠感恩還困難時吳孟達出手相助
羅冠蘭跟吳孟達是同期藝員訓練班畢業，當時對他最深刻是有次在聖誕派對上對方為她解困：「我唔小心將碟雞翼沙律倒落個身，搞到件衫污糟晒，佢好有風度遞上一條乾淨嘅手巾畀我抹，覺得佢好友善，佢仲將條污糟咗嘅手巾放返入褲袋，令我好感動。」兩人後來一直沒有聯絡，直至十多年前合作一部電影飾演夫妻，在傾談的過程中，讓羅冠蘭感到對方很誠懇：「大家會討論演戲嘅理念，而佢嘅閱歷變成佢嘅修為，畀人一種好祥和嘅氣場，同佢相處好舒服。」對於他突然離世，她自言感到愕然，亦有點依依不捨。
關禮傑初演喊戲靠吳孟達點醒
關禮傑稱兩人第一部合作的劇集是《新紮師兄》，對方飾演教官：「喺真實同娛樂圈入面，都係佢睇住我哋成長。佢演繹嘅教官角色，後來好多人都跟佢呢個風格。（你當年驚唔驚佢？）唔驚，佢好講得笑，我哋又好百厭，佢會鬧我哋又會教我哋。佢喺交流戲方面好嚴肅，令大家好易入戲，喺佢身上學到好多嘢。（邊一幕最難忘？）有一場講我離開學堂，我畀佢感動到學識流眼淚，係我第一次喺螢光幕前流淚，覺得自己演技升華咗。」他視對方為大師兄，兩人其後在內地電影上亦有合作過，他讚揚對方令整個劇組很團結：「大家相處好融洽，佢為人又豁達，例如天氣降溫，佢會畀錢買羽絨畀啲工作人員，大家同佢合作完都話佢好好，口碑好好。」他指雖然近兩年未有聯絡，但也有在活動中遇到，坦言對其離世感到突然：「我知道佢入醫院，喺演員群組入面都有話佢情況唔係咁好。但冇辦法，人生冇得選擇，希望佢主懷安息。」
來源 source: http://hk.on.cc
|
鍾意就快D Share啦！
|
|
|