爭兩歲就七十歲嘅資深演員羅莽（羅師傅），功夫硬漢形象深入民心，但原來鐵漢柔情嘅佢，八九年喪妻之後一直單身，至前年，先爆出佢再迎第二春。原來，喺一一年，佢跟內地女子Vivian撻着，而女友因工作關係，經常中港兩邊走，來港時先跟羅師傅同居，照顧佢嘅起居飲食。
早前大約四點，東姑就撞見羅師傅與疑似女友Vivian，喺九龍城廣場孖住拍拖行街。兩人入咗一間電器店，集中睇啲電水壺、電飯煲等嘅小型家電；不過，行咗幾個圈，最後都係一無所獲。到離開時，經過商場一個展覽櫥窗，羅師傅眼見展出舊式戲院嘅座椅、菲林及剪報，個樣即刻非常雀躍，仲手指指叫埋女友一齊欣賞。羅師傅一邊睇，一邊口若懸河向女友講古話當年，睇嚟，佢好懷念昔日喺大銀幕嘅演出，做武打明星嘅年代。
東姑現場所見，羅師傅同女友行街期間，不時有傾有講，說話語氣溫柔，之但係，兩人全程都冇拖手，或者表現得太親密。相信，因為佢哋已經儼如「老夫老妻」，所以愛得比較含蓄囉！
當經過商場一個懷舊展覽櫥窗時，羅莽精神為之一振，拉住女友停低欣賞參觀。
喪妻單身多年嘅羅莽，一一年喺內地認識年輕自己廿年嘅女友Vivian，成功覓得第二春。
行電器店時，兩人集中火力選購電飯煲等小家電，可惜最後都係睇唔中，一無所獲。
來源 source: http://eastweek.my-magazine.me
|
鍾意就快D Share啦！
|
|
|
