俗語有云「先撩者賤，打死無怨」，鍾培生早前約林作挑戰「百萬林鍾一戰」，雷聲大雨點小，連日二人隔空展開N場牙骹戰，口水四濺，讓網民質疑炒作，批評要打就快打。在鍾培生連番催促下，林作終於簽署擂台戰合約，並簽生死狀，引起全城熱話的「百萬林鍾一戰」將在9月中開戰，一共打4個回合，每回合2分鐘，如果林作臨時縮沙要賠償宣傳損失。
林作和鍾培生身穿西裝，今午3點幾鍾培生與林作開記招交代合約細節，又變成「口水戰」，吸引過百傳媒到場。林作稱今次會認真去打，鍾培生則講明會拖慢打，不會太快KO林作，林作媽咪Lily就十分希望兒子打百萬擂台戰，今日到場支持。
記者會開始前，林作和鍾培生應要求讓在場傳媒拍照，再坐下一齊受訪，記者會甫開始，鍾培生已顯露不滿情緒，動作、表情都不耐煩，嬲爆爆咁款，相反林作尷尬地笑，不時抓頭摸面，鏡頭前鍾培生明顯懶理林作，眼尾也不望對方。
林作指100萬出場費會同於自己事業，又透露合約內容：「按照合約，可按照自己磅數，公平嘅。我一定會認真打，希望打贏，信心有嘅，做嘢我好少冇信心。」他又多謝鍾培生畀足夠時間訓練：「比賽喺9月中，林作會係一個不同嘅人，會係一個拳手。」此時鍾培生即插嘴，嘲林作係屎：「「little piece of shxt變咗big piece of shxt.」、「冇我，你係一文不值囉！係我先定到你價位。」
鍾培生有打開拳，林作是初哥，但林作指不怕欠缺經驗，自稱上手快，有運動細胞，下星期開始會接受向柏榮師傅的訓練，又吹水說已睇電影熟習拳擊運動：「我都睇咗好多電影，首先係何金銀（編按：周星馳《破壞之王》角色。）」鍾培生聽到即擰頭。
林作被問到會否立遺囑？他卻借機賣sell保險說：「冇冇冇，買多份人壽，保險最實際。」他又指媽媽比自己肉緊出場費：「佢好希望快啲打，佢以為今日打，所以坐咗喺後面，我覺得我屋企人唔係好鍾意我。」被鍾培生連問三次：「有邊個鍾意你？」
鍾培生非常輕視林作：「如果我認真打，10秒就knock（擊倒）佢，我成日講係要fxxking break him.」他表示有向師傅指導，不怕打死林作，但又蔑視林作：「我本來係想搵殯儀館sponsor，不過而家搵輪椅會好啲。」林作插嘴說培生培生會員有「漢奸」倒戈支持自己，鍾培生反唇相譏：「收皮你啲自信邊到嚟？you’re piece of shxt，你照鏡時候有冇蒙羞？」
鍾培生繼續貶底林作：「佢嘅人生讀咁多書，得一個價值，就係坐喺我隔籬俾人打。」有人擔心林作在擂台上出陰招，鍾培生鬧林作是屎：「你啲睇清楚佢嗰樣，睇下呢pat屎可以做咩出嚟？呢pat屎如果喺台上面出陰招，我會唔會揼爆佢？look at me, I’m fxxking champ.」
此外，鍾培生提出「出賽限重」，量秤於賽事前一日舉行，如鍾培生超重，判林作技術勝出，若雙方可以商量照打，鍾培生每超重0.5kg 賠1萬元，而林作不受限，鍾培生亦同意賽後向林作支付表演及出賽費用100萬元。畢竟拳腳無眼，林作之前從未學過打拳，為免打死無命賠，林作由下星期開始將接受幾個月特訓，努力準備應戰。
-----------------------------
《蘋果》英文版免費試睇：了解更多
英文版已登錄《蘋果》App，立即下載/ 更新：iOS/Android
-----------------------------
支持蘋果深度報道，深入社區，踢爆權貴，即Like蘋果專題及調查組FB專頁！
來源 source: http://hk.appledaily.com
|
鍾意就快D Share啦！
|
|
|